Kvılt-festıvali jyl saıyn uıymdastyrylady
2022 jyldyń 18-20 karasha aralyǵynda Almaty qalasyndaǵy Qazaqstan Respýblıkasy Memlekettik ortalyq mýzeıinde «Shyǵys Bazary» atty halyqaralyq kvılt-festıvali ótedi, dep habarlaıdy Almaty-akshamy.kz.
Festıváldi uıymdastyrýshy – «Qazaqstannyń quraq quraý sheberleri birlestigi», jetekshisi Shtrosherer Tamara Bekmuratqyzy. Birlestiktiń basty maqsaty – quraq dep atalatyn sándik-qoldanbaly ónerge negizdelgen kórkem kvılt baǵytyn damytý, ózindik qoltańbasy bar qazaqstandyq sheberlerdiń eńbegin álemdik deńgeıde tanytý.
«Shyǵys Bazary» kvılt-festıvali Qazaqstan, Germanıa, Shveısarıa, Reseı, Qyrǵyzstan jáne taǵy basqa elderdiń qolónershilerin bir-birimen jaqyn tanystyryp, tájirıbe almasýǵa múmkindik beredi. Kvılt-festıvali jyl saıyn uıymdastyrylady, 2022 jyly segizinshi ret ótkizilmek. Qazirgi kezde ónerdiń bul túrine degen qyzyǵýshylyq artyp, kvılt óneriniń jankúıerleri de kóbeıe tústi. Qatysýshylar men qonaqtar merekege qatysyp qana qoımaı, toqyma óneriniń shyǵarmashylyq álemimen tanysa alady.
Festıvál baǵdarlamasynda:
- «Djıns Inspiration» baıqaýy. Baıqaýdyń taqyryby qorshaǵan ortany qorǵaý men kóne zattardy utymdy paıdalanýǵa baılanysty bolmaq. Óner jáne sán salasynyń mamandary úsh nomınasıa boıynsha saıysqa qatysqan 129 úmitkerdiń arasynan jeńimpazdy anyqtaıdy. Festıvál demeýshisi «Tigin mashına úıi» kompanıasy ár nomınasıa boıynsha anyqtalǵan jeńimpazdarǵa baǵaly syılyqtar – bernette jáne VERITAS tigin mashınalaryn usynady. Al festıváldiń bas demeýshisi – BERNINA shveısarıalyq kompanıasynyń ókili gran-prı syılyǵyn tabystaıdy. Jumysy úzdik dep tanylǵan sheberge premıým-klass tigin mashınasy beriledi.