Almaty qalasynyń Sıfrlandyrý basqarmasy máslıhattyń qaraýyna «Almaty qalasynyń jol qozǵalysyn taldaý jáne qaýipsizdikti qamtamasyz etýdiń zıatkerlik júıesi» («Sergek» MJK) jobasy boıynsha memlekettik-jekeshelik áriptestik shartyn uzartý týraly sheshim jobasyn engizdi, - dep habarlaıdy Aqshamnews.kz.
Bul týraly depýtattar aldynda baıandama jasaǵan Almaty qalasy sıfrlandyrý basqarmasy basshysynyń mindetin atqarýshy Meıram Dúsúkov málimdedi.
Negizgi tezıster:
▪️ «Sergek» MJK jobasy 2021 jyldan beri iske asyrylyp keledi.
Shart Almaty qalasynyń Sıfrlandyrý basqarmasy, Polısıa departamenti jáne «Kórkem Telekom» JSHS arasynda jasalǵan.
▪️ Bastapqyda 766 aparattyq-baǵdarlamalyq keshen ornatý kózdelgen.
Memlekettik mindettemeler kólemi – 9,9 mlrd teńge.
▪️ 2021 jyldan beri 4 ret qosymsha kelisim jasalyp, keshender sany 1641 APK-ǵa deıin ulǵaıtyldy.
▪️ Qoldanystaǵy sharttyń merzimi 2025 jylǵy 31 jeltoqsanda aıaqtalady.
Osyǵan baılanysty qala ákiminiń tapsyrmasymen jumys toby quryldy.
▪️ Jumys toby 4 áleýetti jetkizýshiniń balamaly usynystaryn qarady, sonyń ishinde:
– «Sýnkar»,
– «Mergen»,
– Presight AI Kazakhstan,
– «Azımýt» júıeleri,
sondaı-aq qoldanystaǵy seriktes – «Kórkem Telekom» usynysy.
▪️ Eki aılyq taldaý nátıjesinde, konkýrs ótkizýge ýaqyttyń bolmaýyna baılanysty, shartty bir jylǵa uzartý usynyldy.
Usynylyp otyrǵan ózgerister:
- Shart merzimin bir ret qana 2026 jylǵy 31 jeltoqsanǵa deıin uzartý;
- Jeke seriktes esebinen qosymsha 350 «Sergek» keshenin ornatý;
- Qyzmet kórsetý tarıfi 2021 jylǵy deńgeıde saqtalady, ósim bolmaıdy.
Atalǵan ózgerister «Memlekettik-jekeshelik áriptestik týraly» zań talaptaryna tolyq sáıkes keledi jáne jeke seriktestiń qosymsha ınvestısıa salýyn kózdeıdi.
Osyǵan baılanysty Almaty qalasy máslıhatynyń 2021 jylǵy 30 sáýirdegi №35 sheshimine ózgeris engizý týraly sheshim jobasy qaraýǵa usynyldy.