Almatydaǵy Respýblıka saraıynda Respýblıka kúnine arnalǵan merekelik konsert ótti, dep habarlaıdy Almaty-akshamy.kz
İs-shara QR Memlekettik Týyn sahnaǵa alyp shyǵýdan jáne Qurmanǵazy atyndaǵy halyq aspaptar orkestri men Almaty qalasy ákiminiń «ALL Jazz Symphony» estradalyq-sımfonıalyq orkestriniń súıemeldeýimen Baıqadamov atyndaǵy hor kapelasynyń Memlekettik Ánurandy oryndaýynan bastaldy.
İs-sharaǵa Almaty ákimi Erbolat Dosaev, qoǵam qaıratkerleri, máslıhat depýtattary, qalanyń shyǵarmashylyq zıalylary jáne t.b. qatysty.
Konsertke Aıgúl Úlkenbaeva, «Asyl» kvarteti, «ArtEast» art-baleti, «Boztorǵaı» balalar hory, Ábilqaıyr Jumabaı, Alsý Ulýhanova, Dınaıa, Rýhıa Baıdýkenova, «Mezzo» toby, «Terra», «Saltanat» bı ujymdary, «Jetisý» mektebiniń solıseri Mádına Sharıpova, Murathan Dıas, Úmit Joldybaıqyzy, Erlan Rysqalı, Álı Oqapov, Dınara Sultan, Lýına, Nurlan Abdýlın, Jeltoksan jáne The Buhars, Jánıa Áýbákirova, «Adagio» dýeti, Nurbolat Abdýllın, Qazybek Quraıysh, Aııa Shárip jáne Esjan Áset qatysty.
Patrıottyq ánder shyrqalyp, sahnada Otanǵa degen súıispenshilikti beıneleıtin bı jáne shyǵarmashylyq nómirler qoıyldy. Konsert «Men seni súıemin Qazaqstan» kompozısıasyn barlyq qatysýshynyń oryndaýymen aıaqtaldy.
Buǵan qosa, qala men aýdandarda Respýblıka kúni basqa da birqatar is-shara uıymdastyrylǵanyn eske salamyz:
- Jibek joly dańǵylynda, Panfılov pen Báıseıitova kósheleriniń arasynda saǵat 10:00-den 18:00-ge deıin qolónershiler jármeńkesi ótedi. Jármeńkede Qazaqstan, Ózbekstan jáne Qyrǵyzstan sheberleriniń qoldan jasalǵan qolóner jumystary usynylady.
- 10:00-den 18:00-ge deıin sporttyq-jattyǵý kesheninde shaǵyn fýtbol, voleıbol jáne dzúdodan, sonymen qatar, ál-Farabı atyndaǵy QazUÝ-da ústel tenısi jáne qazaq kúresinen sporttyq festıvál ótedi.
- Saǵat 10:30-da «Medeý» BTSK-da Memlekettik tý kóterilip, Qazaqstan Ánurany oryndalady. İs-sharaǵa qala jastary, qoǵam qaıratkerleri, Almaty qalasy máslıhatynyń depýtattary jáne Qazaqstan halqy Assambleıasynyń ókilderi qatysady. Sonymen qatar, qalanyń barlyq aýdanynda Memlekettik tý kóterilip, Qazaqstannyń Ánurany oryndalady.
- Jetisý aýdanynda 25 qazan kúni saǵat 11:00-de Serikov kóshesi, 2a mekenjaıyndaǵy «Gúlder» saıabaǵynda «Jas Táýelsiz Qazaqstan» atty merekelik konsert ótedi.
- Saǵat 11:00-de Jambyl atyndaǵy qalalyq jasóspirimder kitaphanasynda «El órkenin ósirgen azattyq» taqyrybynda kvız jáne «Deklarasıa-táýelsizdikti bekitýdiń alǵashqy qadamy» kórmesi ótedi.
- Saǵat 12:00-de «Alatau creative hub» aýmaǵynda «Elim meniń» merekelik konserti ótedi.
- Áýezov aýdanynda 25 qazan kúni saǵat 12:00-de Family park demalys saıabaǵynda «Respýblıka kúnine arnaý» atty konserttik is-shara ótedi.
- Saǵat 14:00-de Kók-tóbe saıabaǵynda «Almaty áýenderi» shyǵarmashylyq ujymdarynyń qatysýymen «Jasaı ber máńgi – Qazaqstan» atty merekelik konsert ótedi.
- Balýan Sholaq atyndaǵy sport saraıynda 15:00-den 18:00-ge deıin qazaqstandyq estrada juldyzdarynyń qatysýymen qazaq kúresinen «Óner barysy» týrnıri ótedi.
- Saǵat 16:00-de Qazaq memlekettik sırkinde Respýblıka kúnine jáne sırk ártisiniń 70 jyldyǵyna oraı ataqty kloýn jáne sıqyrshy Kárim Mutyrǵanovtyń benefısi uıymdastyrylady. Akrobattar, áýe gımnasttary, jonglerler, ekvılıbrıser, ıllúzıonıster men saıqymazaqtar shoý-baǵdarlama kórsetedi.