Almatyda sarapshylar Raıymbek dańǵylyndaǵy BRT qurylysyn birneshe kezeńge bólýdi usyndy
Almatyda kólik salasyndaǵy sarapshylar, ýrbanıster jáne BAQ ókilderi Raıymbek dańǵylynda Pýshkın kóshesinen Seıfýllın dańǵylyna deıingi BRT dáliziniń birinshi ýchaskesiniń jobasy usynylǵan dóńgelek ústel ótti, dep habarlaıdy aqshamnews.kz
Jobany halyqaralyq konsýltanttar men Almaty kólik júıesin damytý jobalyq keńsesiniń qoldaýymen «Almatybasjospar» ǵylymı-zertteý ınstıtýty ázirledi.
Ázirleýshilerdiń aıtýynsha, joba aıasynda mınımaldy úzilistermen arnaıy jolaqtar jasaý, jańa aıaldama keshenderin ornatý, sondaı-aq «qasbetten qasbetke deıin» qaǵıdaty boıynsha dańǵyl boıyn keshendi kóriktendirý kózdelgen.
«Qaqtyǵys núkteleri az bolatyn ýchaskelerde arnaıy jolaqtar joldyń shetinde bolady. Turaq oryndaryn saqtaý qajet nemese kórshi aýmaqtardan shyǵatyn joldar kóp bolǵan jerlerde, arnaıy jolaqtar býlvar bóliginiń boıynda ornalasady. Osylaısha, barlyq qozǵalys qatysýshysynyń múddesi barynsha eskeriledi. Aıaldamalardy platformalarda jabdyqtap, qıylystarǵa jaqyn ornalastyrý josparlanýda. Bul rette, avtokólikterdiń negizgi jolaqtary saqtalady», - dedi «Almatybasjospar» basshysy Asqat Sádýov.
Sonymen qatar, onyń aıtýynsha, bıyl Qonaev kóshesinen Chaıkovskıı kóshesine deıingi býlvarlyq bólikti kóriktendirý jumystary júrgiziledi.
«Biz kósheni «qasbetten qasbetke deıin» qaǵıdasy boıynsha jobaladyq, ıaǵnı tek jol bóligin ǵana emes, sonymen qatar trotýarlardy, aýlalaryn, kógaldandyrýdy da qamtydyq. Qasbetter biryńǵaı dızaın-kodqa keltiriledi. Jobanyń memlekettik saraptamasy shilde aıynyń ortasynda ǵana aıaqtaldy, biz árıne, qorytyndyny erterek alamyz degen edik, biraq «keshendilikti» eskerip, jobany eki ret jasaýǵa týra keldi. Qyrkúıek aıynda Seıfýllın dańǵylynan Ahrımenko kóshesine deıingi jáne Ahrımenko kóshesinen «Barlyq» bazaryna deıingi BRT dáliziniń ekinshi boıynsha jobalaý jumystary aıaqtalady dep kútilýde», - dedi Asqat Sádýov.
Óz kezeginde kezdesýge qatysqan sarapshylar bul jobanyń Almatynyń qoǵamdyq kólik júıesin damytý jáne qala turǵyndarynyń mobıldigin arttyrý úshin mańyzdylyǵyn atap ótti. Olardyń pikirinshe, 2030 jylǵa deıin qalanyń kólik qańqasynyń bekitilgen sheber jospary aıasynda ázirlengen Raıymbek dańǵyly boıynsha BRT dálizi joǵary talaptarǵa jaýap beredi jáne ol qala turǵyndarynyń kóńilinen shyǵady.
«BRT dálizi shynymen de qoǵamdyq kóliktiń tartymdylyǵyn arttyra alady, bul fakt. Biraq bizdi onyń júzege asyrylý merzimi alańdatady. Raıymbek – kólik óte kóp júretin kóshe, qyrkúıekte sabaq bastalyp, stýdentter keledi jáne eger dál osy kezeńde qurylys jumystaryn bastasaq, kollaps bolady dep oılaımyn. Sondyqtan, jumysty kelesi jyly bastaǵan durys emes pe?», - dedi «Jalpy jol» qaýymdastyǵynyń jetekshisi Arsen Shakýov.
Roman Barabanovtyń pikirinshe, búkil kósheni birden rekonstrýksıalaý oryndy bolar edi.
«Dańǵyldy birneshe segmentke bólip, árqaısysyna ártúrli merdigerlerdi anyqtaý meniń oıymsha qısynsyz. Mundaı jaǵdaıda baqylaý jáne sapany qamtamasyz etý qıyn bolady. Eger bólip isteseńiz, joba jumys istemeıdi. BRT dálizi tıimdi bolýy úshin búkil dańǵyldy rekonstrýksıalaýǵa tyrysý kerek, eń bolmaǵanda keıbir aımaqty aldymen tańbalap jasaýǵa bolady», - dedi Roman Barabanov.
Talqylaý qorytyndysy boıynsha, sarapshylar qaýymdastyǵynyń pikirin eskere otyryp jáne qala turǵyndary úshin qolaısyzdyqty azaıtý maqsatynda joba boıynsha qurylys-montajdaý jumystaryn kelesi jyldyń sáýir aıynda bastaý týraly sheshim qabyldandy.
«Kúzde biz BRT dáliziniń birinshi kezeńiniń eki ýchaskesine, ıaǵnı Pýshkın kóshesinen Seıfýllın dańǵylyna deıin jáne Seıfýllın dańǵylynan Ahrımenko kóshesine deıingi merdiger uıymdy anyqtaý úshin baıqaý jarıalaýdy josparlap otyrmyz. Bıyl ınjenerlik jelilerdi qaıta qurý, ósti bólý sıaqty daıyndyq jumystaryn bastap, «Saıahat» mańynda iri aıaldama keshenderiniń qurylysyn aıaqtaımyz. Al eki ýchaske boıynsha negizgi qurylys-montajdaý jumystaryn kelesi qurylys maýsymynan bastaımyz», - dedi Qalalyq mobıldilik basqarmasynyń basshysy Saǵyndyq Telibaev.