Bastapqy jáne tanymal blogerler ınternettegi qazaq tilindegi kontentti qalaı jasaý jáne ilgeriletý jaıyn talqylady, dep habarlaıdy aqshamnews.kz
Forýmdy Almaty qalasy Qoǵamdyq damý basqarmasyna qarasty qoǵamdyq damý ortalyǵy uıymdastyrdy. Bir alańda shyǵarmashylyq qaýym men medıaındýstrıa mamandary bas qosty. Sarapshylar qazaq tilindegi qyzyqty ári sapaly kontenttiń tanymal ınternet alańdarynda jetispeýi máselesin kóterdi.
– Búginde memlekettik tilde jazylǵan posttar men vıdeorolıkter áleýmettik jelilerde jıi shyǵa bastady, rasynda da jaqsy kontent bar, biraq áli de az. Kóptegen taqyryptar bos tur. Buny ózgertý úshin tek aıtý emes, naqty áreket qajet. Sondyqtan biz QAZAQVISION forýmyn uıymdastyrýdy uıǵardyq. Bul forým qazaq tilinde sapaly kontent jasaǵysy keletinderdi jáne sala mamandaryn biriktirdi, – dedi shara uıymdastyrýshysy Damır Yskaq.
Forým aldynda Instagram jelisinde qazaqtildi kontentke arnalǵan beınerolıkter baıqaýy ótkizildi. Uıymdastyrýshylar yńǵaıly bolý úshin naqty taqyryp – ulttyq salt-dástúrlerdi belgiledi. Baıqaýǵa 96 jumys kelip tústi. Arnaıy komısıa olardyń ishinen úzdik alty vıdeony iriktep, avtorlarǵa aqshalaı syılyqtar tabystady. Jalpy júlde qory eki mıllıon teńgege jýyq boldy.
– Bolashaqta bul baıqaýǵa qatysýshylar sanyn kóbeıtýdi, ony tek Instagram-da emes, TikTok-ta da ótkizýdi josparlap otyrmyz. Biz bul baıqaýdyń turaqty jobaǵa aınalǵanyn qalaımyz, – dedi Damır Yskaq.
Baıqaý jeńimpazdarynyń biri – syrǵa salý dástúrine arnalǵan vıdeorolık túsirgen bloger Aqjarqyn Kerimbekova boldy.
– Bul – kishkentaı kezden árbir qyz bala armandaıtyn, óte ádemi qazaqtyń dástúri. Beınejazbada meniń segiz jastaǵy sińilim tústi. Ol qýana kelisti. Men blog júrgizip júrgenime eki jyl boldy. Kontentim negizinen bútı ındýstrıa taqyrybyna arnalady. Qyzdarymyz árdaıym ádemi júrse eken deımin. Áleýmettik taqyryptaǵy rolıkterim de bar. Qazir 38 myń jazylýshym bar, bolashaqta kóbeıedi dep úmittenemin. Osyndaı baıqaýlar óte úlken motıvasıa beredi, – deıdi Aqjarqyn.