Almaty ákimi Darhan Satybaldy aldaǵy jylytý maýsymyna daıyndyq jóninde jumys keńesin ótkizdi. Jıyn barysynda qala basqarmalary, komýnaldyq qyzmetter men merdiger uıymdardyń basshylary atqarylǵan jumystar men ınjenerlik ınfraqurylym nysandaryn jańǵyrtý jáne salý jóninde esep berdi, dep habarlaıdy aqshamnews.kz
Bıyl 39 shaqyrym jylý jelilerin, 238 shaqyrym elektr jelilerin, 260 shaqyrym sý qubyryn jáne 34,7 shaqyrym gaz jelisin qaıta jańartý josparlanǵan. Sonymen qatar, 2025 jyly 347 shaqyrym sý jáne káriz jelilerin salý jáne jańǵyrtý, sondaı-aq, 69 qazandyqty jóndeý jáne 16 qazandyqty jańǵyrtý josparlanǵan. Bul jumystar aıasynda 12 qazan, 47 mehanızm, 11 syıymdylyq jáne gaz jabdyqtary aýystyrylady.
Keńeste ınjenerlik jelilerdiń qazirgi jaǵdaıyna qatysty derekter usynyldy: tozý deńgeıi – jylý jelilerinde 56,1%, elektrmen jabdyqtaýda 64,5%, sýmen jabdyqtaýda 51,73%, gazda 36%. Qala ákimi ınjenerlik ınfraqurylymdy jańartý boıynsha júıeli jumystyń mańyzdylyǵyn atap ótti.
«Men kún saıyn jylytý maýsymyna daıyndyq barysy týraly málimet alyp otyramyn. Eger qandaı da bir kesheýildeý bolsa, dereý shara qoldanamyz. Magıstraldyq jeliler men energetıkalyq jobalardy jańǵyrtý boıynsha kelisimsharttar jasalǵan, qarjylandyrý qamtamasyz etilgen, jumys júrgizilip jatyr. Baqylaýdy bosańsytýǵa bolmaıdy, ásirese, turǵyn sektor men áleýmettik nysandardyń daıyndyǵyna erekshe nazar aýdarý qajet», – dedi Darhan Satybaldy.
Keńesten keıin Darhan Satybaldy qalanyń birqatar mańyzdy ınfraqurylymdyq nysanyn aralady. Qalanyń negizgi energıa kózderiniń biri – JEO-2-de ol energetıkalyq jáne qosalqy jabdyqtarǵa júrgizilip jatqan aýqymdy jóndeý jumystarymen tanysty. Jańǵyrtý jobasy ekologıalyq jáne energetıkalyq turaqtylyqty arttyrýǵa baǵyttalǵan. Elektr qýatyn 557 MVt-qa, jylý qýatyn 952 Gkal/saǵ deıin arttyryp, zıandy zattar shyǵaryndylaryn 93%-ǵa, al kómirtek izi 38%-ǵa tómendetý kózdelýde.
«JEO-2-ni jańǵyrtý – eń mańyzdy mindetterdiń biri. Bul qalanyń ekologıalyq turaqtylyǵy men jaıly ómir súrý ortasyn qamtamasyz etetin strategıalyq joba. Ekologıalyq kórsetkishterdi jaqsartý Almatynyń damýyna qosylǵan mańyzdy úles», – dedi Darhan Satybaldy.
Qala ákimine qada qaǵý jumystarynyń 47%-y oryndalǵany, irgetas quıý men qurylymdardy ornatý jumystary jalǵasyp jatqany, negizgi jabdyq jetkizilip jatqandyǵy týraly baıandaldy. Sonymen qatar, qysqy maýsymǵa daıyndyq aıasynda jóndeý jumystary júrgizilýde: 56-syn jóndeý josparda bolsa, sonyń 36%-y bitken.
Qala ákimi «Orbıta» aýdandyq qazandyǵyn da baryp kórdi. Bul qazandyq ońtústik aýdandardy – Orbıta 1-4, Almagúl shaǵyn aýdandaryn jáne Asqarov kóshesin jylý jáne ystyq sýmen qamtamasyz etedi. Munda kólemi 2000 m³ úsh akýmýlátorlyq bak ornatylýda. Eki bak paıdalanýǵa berildi, úshinshisi ornatylyp jatyr. Joba eń joǵary tutyný kezinde de jylý júktemesin teńestirýge jáne jylýmen qamtýdyń turaqtylyǵyn arttyrýǵa múmkindik beredi.
Bostandyq aýdanynda qala ákimi 1972 jyly paıdalanýǵa berilgen «Ońtústik» qazandyǵyn keńeıtý jumystarynyń barysymen tanysty. Qýaty 190 Gkal/saǵ bul qazandyq 356 kópqabatty turǵyn úı men 39 áleýmettik nysandy jylýmen qamtıdy. Qýatyn 290 Gkal/saǵ deıin arttyrý jobasy arqyly qalanyń ońtústik bóligindegi qosymsha 100 myńǵa jýyq turǵyndy ortalyqtandyrylǵan jylýmen qamtamasyz etý kózdelgen.
Jobada jańa qazandyq sehynyń qurylysy, zamanaýı sýqyzdyrǵysh qazandyqtar men qosalqy jabdyqtardy – rezervýarlar, tazartý qurylǵylary jáne órt sóndirý júıesin ornatý qarastyrylǵan. Qala ákimi jobanyń merziminde oryndalýyn qamtamasyz etip, jylytý maýsymy bastalǵanǵa deıin barlyq daıyndyq jumysty aıaqtaýdy tapsyrdy.
Buqar Jyraý – Masanchı – Ǵabdýllın – Baıtursynov – Sátbaev kósheleri aýmaǵynda 1983 jyly paıdalanýǵa berilgen jylý trassasy qaıta jańǵyrtylyp jatyr. Bul jeli 220-dan astam nysandy – turǵyn úılerdi, mektepter men medısına mekemelerin jylýmen qamtamasyz etedi. Bıyl 1,5 shaqyrym qubyr aýystyrý josparlanǵan. Qala ákimine bul jumystardyń eki jylǵa josparlanǵany jáne 2026 jylǵa ótetini habarlandy. Jańǵyrtý kezinde ystyq sý berý toqtatylmaıdy.
Jumys sapary qorytyndysy boıynsha Darhan Satybaldy jylytý maýsymy bastalǵanǵa deıin barlyq negizgi jumysty aıaqtaýdy, ásirese mektep, balabaqsha men aýrýhana syndy áleýmettik nysandarǵa erekshe nazar aýdarýdy tapsyrdy. Qysqy maýsymǵa daıyndyqtyń sońǵy merzimi – 31 tamyz. Darhan Satybaldy jobalardyń sapasy men merziminiń oryndalýyna turaqty baqylaý bolatynyn jáne ınfraqurylymdy jańǵyrtý sharalary ákimdik qyzmetiniń basym baǵyty bolyp qala beretinin atap ótti.