Búgin Almaty qalasynda Almaty Digital Medical Center (ADMC) - Qazaqstandaǵy tuńǵysh Sıfrlyq medısına ortalyǵynyń ashylý rásimi ótti. Joba Almaty qalasy Qoǵamdyq densaýlyq saqtaý basqarmasy men Sıfrlandyrý basqarmasy arasyndaǵy memorandým aıasynda júzege asyryldy.
İs-sharaǵa Almaty qalasy QDSB basshysy orynbasarynyń m.a. Laıla Imangalıeva qatysty.
Ortalyqty qurýdyń basty maqsaty - qalanyń densaýlyq saqtaý júıesiniń ashyqtyǵy men tıimdigin arttyrý. Sıfrlyq medısına ortalyǵy - emhana jumysyn, turǵyndardyń densaýlyǵyn baqylaýdy jáne halyqpen baılanysty túbegeıli ózgertetin keshendi sıfrlyq platforma.
ADMC quramyna kiretin negizgi sıfrlyq qyzmetter:
- Aqparattyq-taldaý ortalyǵy
- Biryńǵaı baılanys ortalyǵy - 1312
- Telemedısınalyq patronaj
- Jasandy ıntellekt negizindegi vırtýaldy daýystyq kómekshi
- Telemedısına qyzmeti
- Aqparattyq-taldaý ortalyǵy
Jasandy ıntellekt kómegimen eseptilik qalyptastyratyn, óńirdiń aýqymdy medısınalyq deregin óńdeýdi qamtamasyz etetin jáne MSAK jelisiniń bıznes-prosesterin qaıta qurýmen aınalysatyn sarapshylar toby. Ortalyq mamandary densaýlyq kórsetkishterin naqty ýaqyt rejıminde baqylap, taldap, alynǵan aqparatty basqarýshylyq sheshim qabyldaý úshin QDSB-ǵa joldaıdy
Biryńǵaı baılanys ortalyǵy - 1312
Almatylyqtardyń densaýlyq saqtaý máseleleri boıynsha qońyraý qabyldaıdy, sol arqyly emhananyń tıimdi jumysyn qamtamasyz etedi.
Pasıent dárigerge jyldam jazylady jáne suraqtaryna jedel jaýap alady.
Dárigerler men ákimshilik qyzmetkerler qońyraýǵa alańdamaı, pasıentke kóbirek kóńil bóle alady.
Kontakt-ortalyq azamattardyń barlyq ótinishin qabyldap, júıelep, mańyzdyǵyna qaraı suryptaıdy jáne júıeli problemalardy taldaıdy.
Bul sheshim emhana tirkeý bólimderiniń jáne QDSB-nyń júktemesin shamamen 20%-ǵa azaıtyp, turǵyndardyń joǵalǵan qońyraýyn 1%-ǵa deıin tómendetýge múmkindik beredi.
Telemedısınalyq patronaj
Pasıentterdi qashyqtan baqylaýdyń zamanaýı formaty, ol medısınalyq kómektiń qoljetimdigin arttyryp, MSAK qyzmetkerleriniń júktemesin azaıtady.
Telepatronaj aıasynda maman pasıentke qońyraý shalyp nemese onlaın-konsýltasıa ótkizip, jaǵdaıyn qadaǵalaıdy, dári qabyldaýyn eske salady jáne dárigerge barýdy baqylaıdy. Sonymen qatar kúrdeli jaǵdaıda jedel sheshim qabyldaý úshin telemedısınalyq konsılıým uıymdastyrý múmkindigi engizilgen.
Bul tásil kezekti azaıtyp, maýsymdyq aýrýdyń taralý qaýpin tómendetedi. Sondaı-aq naýqastyń jaǵdaıy nasharlaý qaýpin der kezinde anyqtap, aýrýhanaǵa jatqyzý sanyn qysqartý arqyly densaýlyq saqtaý júıesiniń júktemesin jáne qarjylyq shyǵyndy azaıtady.
Jasandy ıntellektke negizdelgen daýystyq kómekshi
Pasıentti skrınıngke, vaksınalaýǵa, flúorografıaǵa avtomatty túrde shaqyrady, qabyldaý ýaqytyn eske salady jáne nátıjeni tirkeıdi (kelisimin berdi, bas tartty nemese tekseristen ótti). Bul servıs medısına qyzmetkerlerin kúndelikti qońyraý shalýdan bosatady.
Mysaly, bir jyldyń ishinde tek flúorografıadan ótý úshin shamamen 545 myń qala turǵyny shaqyrylady. Mundaı kólemdi qolmen qamtý óte kóp ýaqytty alady jáne is júzinde múmkin emes. Al skrınıng pen vaksınalaýdy qosa alǵanda, shaqyrtý mıllıondaǵan qońyraýǵa jetedi. Endi bul jumysty daýystyq kómekshi atqarady, al medısına qyzmetkerleri dıagnostıka men emdeýge kóbirek ýaqyt bóledi.
Telemedısına qyzmeti
Almatyda bul qyzmet 2020 jyldan beri jumys isteıdi. Ol COVID-19 pandemıasy kezinde qala ákimdigi men QDSB bastamasymen iske qosylǵan. Bastapqyda negizgi mindet - koronavırýspen syrqattanǵan naýqasty úı jaǵdaıynda qashyqtan baqylaý bolatyn.
Qazir telemedısına qyzmeti táýlik boıy jumys istep, keń aýqymdy fýnksıany oryndaıdy:
- 1312 nómiri arqyly turǵyndar ótinishin qabyldaıdy;
- Olardy quzyretine qaraı mamandarǵa joldaıdy;
- Jalpy medısınalyq keńes beredi;
- Qaladaǵy medısınalyq uıym, dárihana, zerthana men jeke ortalyqtar týraly aqparat usynady.
Kún saıyn telemedısınalyq ortalyq mamandary shamamen 1500 naýqasqa qońyraý shalady. Bul - jedel járdem shaqyrǵanymen, shuǵyl gospıtalızasıaǵa jatpaǵan pasıentter. Sondaı-aq júkti áıelderge, bosanǵandarǵa jáne balalarǵa monıtorıń júrgiziledi.
Onlaın-konsýltasıalar
Sıfrlyq medısına ortalyǵynda jetekshi mamandar onlaın keńes beredi: gınekolog, kardıolog, nevropatolog, alergolog, ftızıatr, hırýrg, fýnksıonaldyq dıagnostıka dárigeri, oftalmolog, endokrınolog, reabılıtolog, ınfeksıonıst, mammolog, ýrolog jáne LOR. Bul turǵyndarǵa medısınalyq qyzmettiń keń spektrin zamanaýı sıfrlyq formatta bir jerden alýǵa múmkindik beredi.
Halyqaralyq tájirıbe jáne damý jospary
ADMC álemniń aldyńǵy qatarly elderiniń tájirıbesin, sondaı-aq Qazaqstan óńirleriniń úzdik tájirıbelerin eskere otyryp quryldy. Osy negizde Almaty qalasy Sıfrlyq medısına ortalyǵynyń tujyrymdamasy jasaldy.
2026 jylǵa deıingi jospar:
- Telepatronajdyń jańa baǵyttaryn iske qosý;
- Qalanyń barlyq memlekettik medısınalyq uıymyn Biryńǵaı baılanys ortalyǵyna kóshirý;
- Daýystyq kómekshi qyzmetin damytý;
- Resept pen eńbekke jaramsyzdyq paraǵyn onlaın berý;
- Teleradıologıalyq ortalyq ashý;
- Jasandy ıntellekt negizindegi sheshimdi synaqtan ótkizý úshin sıfrlyq medısınalyq hab qurý.
Almaty Digital Medical Center - jaı ǵana sıfrlandyrý jobasy emes, medısına men halyqtyń ózara is-qımylynyń jańa standarty.
Onyń tıimdigi dáleldendi:
- Medısına qyzmetkerleriniń ondaǵan myń saǵaty únemdeldi;
- Myńdaǵan turǵyn medısınalyq qyzmetke yńǵaıly qoljetimdik aldy
- Densaýlyq saqtaý júıesiniń jumysy ashyq ári basqarýǵa qolaıly bola tústi.