1992 jyly 23 maýsymda Qazaqstan Respýblıkasynyń Prezıdenti “İshki ister organdary týraly” Zańǵa qol qoıdy.
Bul Qazaqstan polısıasynyń mindetteri men fýnksıalaryn, onyń quqyqtaryn, İİO qyzmetkerleriniń áleýmettik kepildikteri men quqyqtyq qorǵalýyn anyqtaǵan alǵashqy akt boldy. Qazaqstan polısıasynyń tarıhy sol kezden bastalady. İshki ister Mınıstrliginiń jańa rámizderi men biryńǵaı kıim úlgileri ázirlendi.
Almatyda polıseıler kásibı merekelerine oraı aqparattyq-ımıdjdik naýqan bastady, dep habarlaıdy Almaty-akshamy.kz Polisia.kz-ke silteme jasap.
Televızıalyq “Qazaqstan polısıasynyń qurdastary”, “Meniń ákem/anam – polıseı”, “Otbasy áýletteri”, “Aramyzdaǵy qaharmandar” jáne “Úzdik polıseı” aıdarlary arqyly azamattar QR İİO-nyń qurylý tarıhymen jáne zamanymyzdyń qaharmandarymen tanysady. Al úzdik tergeýshiler, krımınalıser, jedel ýákilder, kınologtar men ýchaskelik polısıa qyzmetkerleri mereke qarsańynda qalanyń elektrondy bordtarynda kórsetiledi.
– Búgingi tańda qalamyz óziniń qaıtalanbas kelbetin saqtap qana qoımaı, jyl saıyn qarqyndy damyp, kórkeıip keledi. Almatylyqtardyń qaýipsizdigi men tynyshtyǵy mereke jáne demalys kúnderine qaramastan, kúni-túni 6 myńnan astam qyzmetker jumys isteıtin úlken jáne kóp fýnksıaly memlekettik organ – polısıa departamentine júktelgen. Búgingi tańda Almaty qalalyq polısıasynda qylmysqa qarsy kúres júrgizýge, qoǵamdyq tártipti nyǵaıtýǵa jáne qaladaǵy qaýipsizdikti qamtamasyz etýge barlyq qajetti jaǵdaılar men múmkindikter bar, – dedi Almaty qalalyq polısıa departamentiniń resmı ókili Saltanat Ázirbek.
Merekelik is-sharalar İİO basshylarynyń, polısıa ardagerleriniń, qyzmettik mindetterin oryndaý kezinde qaza tapqan polısıa qyzmetkerleriniń týystarynyń, sondaı-aq PD-niń qyzmetteri men bólimsheleriniń jeke quramynyń qatysýymen ótetin merekelik konsertpen aıaqtalady.