Gazettiń alǵashqy nomeri 1913 jyldyń 2 aqpanynan bastap halyqqa jol tartqan
Búgin QR Memlekettik ortalyq mýzeıinde 2023 jyldyń 24 aqpanynda Qazaq gazetiniń 110 jyldyǵyna arnalǵan «Qazaq gazeti - ulttyń aınasy» kesh ótti, dep habarlaıdy Almaty-akshamy.kz mýzeıdiń baspasóz qyzmetine silteme jasap.
«Qazaq» gazeti 1913-1918 jyldary Orynbor qalasynda jarıalanyp turǵan qoǵamdyq-saıası jáne ádebı-mádenı basylym. Gazettiń alǵashqy nomeri 1913 jyldyń 2 aqpanynan bastap halyqqa jol tartqan.
HH ǵasyr basynda qazaqtyń ulttyq rýhyn kótergen «Qazaq» gazetiniń zıaly qaýym ókilderiniń top bastaýshysy, ulttyń ulttyǵyn saqtaýda bar kúshin salǵan ult ustazy, kúresker aqyn, qaıratker Ahmet Baıtursynulynyń eńbegi zor.
Mýzeı dırektorynyń orynbasary Danıar Baıjumanov «Qazaqtyń kózi, qulaǵy jáne tili» bolǵan tuńǵysh ulttyq gazetiniń tarıhyn, táýelsizdik jolynda atqarǵan mindeti men mańyzyn, eń aldymen búgingi urpaq bilýi tıis», - dedi kirispe sózinde.
Sharada tarıh ǵylymdarynyń doktory, A.Baıtursynov mýzeı-úıiniń ǵylymı qyzmetkeri, Abaı atyndaǵy Qazaq ulttyq pedagogıkalyq ýnıversıtetiniń profesory S.Smaǵulova «Qazaq gazetindegi ult máseleleri», Ortalyq mýzeıiniń «Qazaqstan tarıhyn zertteý» bóliminiń ǵylymı qyzmetkeri G.Japaqova «Názıpa Quljanova – tuńǵysh qazaq jýrnalısi» taqyrybynda baıandamalar jasady.
Abylaı han atyndaǵy Halyqaralyq Qatynastar jáne Álem Tilderi Ýnıversıteti, «Turan» jáne Ál-Farabı atyndaǵy Qazaq ulttyq ýnıversıteti jýrnalısıka fakúltetiniń stýdentteri baıandamashylarǵa Á.Jangeldınge qatysty qoǵamda qalyptasqan pikirler, «Qazaq» gazetiniń jabylýynyń sebepteri, t.b. saýaldar qoıyp, tolyqqandy jaýap aldy.
Ánshi Dáýlet Ábýshákir, mýzeı qyzmetkeri Beıimbet Ámirov keshti ádemi ánmen árlep, jyrdan shashý shashyp, ónerimen kópshilikti tánti etken boldy.