Almaty qalasynyń polısıa departamenti qańtar oqıǵalaryna baılanysty qylmystyq quqyq buzýshylyq faktilerin ashýdy jáne tergeý jumystaryn odan ári jalǵastyrýda. Bul týraly Almaty polısıa departamenti bastyǵynyń orynbasary Rýstam Abdrahmanov áleýmettik jelide jazdy, dep habarlaıdy Almaty-akshamy.kz QazAqparatqa silteme jasap.
Onyń aıtýynsha, búgingi tańda sotqa deıingi tergeýdiń biryńǵaı tizilimine polısıa departamenti men onyń aýmaqtyq bólimsheleri 1481 qylmystyq isti tirkedi.
Olardyń ishinde bótenniń múlkin urlaý boıynsha 1 213, bótenniń múlkin qasaqana joıý boıynsha 46, qarý men oq-dárilerdi zańsyz saqtaý faktileri boıynsha 41 is bar.
Joǵaryda atalǵan qylmystardy jasady degen kúdikpen 236 adam ustaldy. Onyń ishinde 214-ine qatysty sot «kúzetpen ustaý» bultartpaý sharasyna sanksıa shyǵardy. Úsh kúdiktige qatysty «eshqaıda ketpeý jáne tártiptilik tanytý qolhaty» túrinde bultartpaý sharasy tańdaldy.
«Júrgizilgen jedel izdestirý is-sharalary nátıjesinde zańsyz aınalymnan 144 atys qarýy men 8 myńnan astam oq-dári tárkilendi. Narazylyq aksıalary kezinde qylmystyq elementtermen Almaty qalasynyń aýmaǵynda ornalasqan 1 602 obektige shabýyldar jasalyp, dúnıe-múlikter talqandaldy. Qazirgi ýaqytta PD tergeý bólimsheleri búlingen obektilerdiń jalpy sanynyń 97%-yn tekserip shyqty. Bul baǵyttaǵy jumys aıaqtalý satysynda», - dedi Rýstam Abdrahmanov.