Almaty aktıvinde Prezıdettiń zardap shekken bıznesti qalpyna keltirý jáne megapolısti odan ári damytý týraly tapsyrmalaryn oryndaý boıynsha sóılegen sózinde qala ákimi B. Saǵyntaev ınfraqurylymdyq jobalardy iske asyrý týraly aıtyp berdi
Almaty ákimi «Jańa Almaty» shet aımaqtaryn damytýdyń Keshendi jospary aıasynda 64 is-shara nemese 428 joba iske asyrylyp jatqanyn atap ótti, dep habarlaıdy Almaty-akshamy.kz
2 jyl ishinde 178 joba iske asyryldy, 177 joba iske asyrylý satysynda, 73 joba kelesi jyldary kózdelgen. Jospar boıynsha jyl saıynǵy qarjylandyrý shamamen 200 mlrd teńgeni quraıdy.
«Búgin Úkimetpen jospar jobalary boıynsha qarjylandyrýdy ulyqtaý máselesin talqylaımyz», - dedi B. Saǵyntaev.
2 jyl ishinde Almatyda 620 shaqyrym sýmen jabdyqtaý jáne káriz jelileri salyndy. 16 turǵyn úı alaby (Medeý aýdanynyń "Dýman" shaǵynaýdany, Túrksib aýdanynyń "Shyǵys tańy", "Qaırat", "Kolhozshy" shaǵynaýdandary, Naýryzbaı aýdanynyń "Quramys", "Tastybulaq" shaǵynaýdandary) sýmen jáne kárizben qamtamasyz etildi. Búdjet jáne MJÁ esebinen jańǵyrtylǵan 42 mektep sport alańyna qosymsha taǵy 30 sport alańy salynady, sóıtip, olardyń jalpy sany 72-ge jetkiziledi.
Bıyl 18 nysannyń, onyń ishinde "Shańyraq-1", "Qarasý", "Aqjar", "Shuǵyla", "Jas Qanat" shaǵynaýdandarynda sýmen jabdyqtaý jáne káriz jelileriniń qurylysy aıaqtalady.
"Qarǵaly", "Qaraǵaıly", "Quramys", "Taý samaly" shaǵynaýdandarynda 50 myń halyqty sýmen qamtamasyz etetin Qarǵaly ózeninde sý tartý qurylysy aıaqtalady jáne Aqsaı ózeni men "Ermensaı" shaǵynaýdanynda taǵy eki sý tartý qurylysy bastalady. Olar "Aqjar", "Aqtóbe", "Ermensaı", "Nurlytaý", "Remızovka", "Taý joly", "Tastybulaq", "Shuǵyla" shaǵynaýdandarynda jáne Almaty oblysynyń Qyrǵaýyldy kentinde 100 myń halyqty qamtıdy.
Almaty ákiminiń aıtýynsha, 2021 jyly 424 shaqyrymnan astam elektr jelileri qaıta jańǵyrtylyp, buryn jaryqtandyrylmaǵan 2024 kóshe jaryqtandyryldy. Bostandyq aýdanynda qýaty 64 MVt «Kaskad» qosalqy stansıasynyń qurylysy aıaqtaldy.
2 jyl ishinde komýnaldyq menshikke 334,1 km ıesiz elektr jelileri jáne 202 transformatorlyq qosalqy stansıalar qabyldandy.
Bıyl Medeý, Alataý jáne Naýryzbaı aýdandarynda uzyndyǵy 147,2 km elektr jelilerin qaıta jańartý aıaqtalady.
«Jyl sońynda biz Bostandyq aýdanyndaǵy «Almagúl» jáne Túrksib aýdanyndaǵy «Tuzdybastaý» eki qosalqy stansıasynyń qurylysyn aıaqtaımyz, bul 400 myń turǵyndy senimdi jáne úzdiksiz elektrmen qamtamasyz etedi», - dedi B. Saǵyntaev.
1066 jartylaı jaryqtandyrylmaǵan kósheler men 486 aýla aýmaqtarynda syrtqy jaryqtandyrý qurylysy aıaqtalady. 24 kósheni jaryqtandyrý jańǵyrtylady.
Almatyda 2 jyl ishinde gazben jabdyqtaý jelilerine 3,8 myńnan astam turǵyn úı qosyldy. Búginde turǵyndardyń 99,2% ortalyqtandyrylǵan gazben qamtylǵan.
Alaıda, 1497 turǵyn úı, onyń ishinde halyqtyń áleýmettik osal toptary gazǵa qosylmaǵan kúıinde qalyp otyr.
Almaty ákimi qala búdjeti esebinen halyqtyń áleýmettik osal toptarynyń otbasylaryn gazǵa qosýdy tapsyrdy.
Jol-kólik ınfraqurylymyna keletin bolsaq, B. Saǵyntaevtyń aıtýynsha, 2021 jyly Rysqulov – Emsov jol aıryǵynyń qurylysy aıaqtaldy, Alataý kóshesin tesý, Abaı boıynsha qozǵalys ashyldy, "Taý samaly" shaǵynaýdanynda Qonaev kóshesin qaıta jańartý aıaqtaldy, Alataý, Naýryzbaı jáne Túrksib aýdandarynyń 8 shaǵynaýdanynda ("Alǵabas", "Shańyraq-5", "Samǵaý", "Ójet", "Álmerek", "Qaırat", "Nurshashqan", "Quramys") 65 km jańa jol salyndy.
"Dýman" shaǵynaýdanyndaǵy joldar kúrdeli jóndeýden ótti. Uzyndyǵy 201 km 206 kóshe ortasha jóndeýmen qamtyldy.
«Aǵymdaǵy jyly Buqtyrma – Qulja jol aıryǵy boıynsha jumystar aıaqtalady. Seıfýllın – Jansúgirov qıylysyndaǵy qozǵalys ashylady. Áýezov kóshesin tesý jumystary aıaqtalady, saıyn kóshesin tesý qurylysy jalǵasady, Tóle bı kóshesin tesý jumystary bastalady. "Alǵabas", "Álmerek", "Qaırat", "Shuǵyla", "Aqjar" jáne "Shapaǵat" shaǵynaýdandarynda 100 km jańa jol salynady», - dep atap ótti Almaty ákimi.
Uzyndyǵy 221 km bolatyn 224 kóshege ortasha jóndeý jumystary júrgizilip, 23 magıstraldy kóshe, sonyń ishinde ál-Farabı, Shyǵys aınalma joly, Rozybakıev jáne t.b kósheler qamtylady.
"Aqbulaq", "Darhan", "Qarasý", "Tastybulaq", "Shuǵyla" jáne t.b. shaǵynaýdandaryndaǵy joldar jóndeledi, 1-shi toqsannyń sońyna deıin «Saryarqa» jáne «Baýyrjan Momyshuly» metro stansıalary iske qosylady, «Qalqaman» stansıasynyń qurylysy jalǵasady.