Almatyda İİM Maqan Esbolatov atyndaǵy Akademıada "Qyzmettik ıdeologıa: tártip, birlik, tutastyq" atty ǵylymı-tájirıbelik konferensıa ótti.
Bul konferensıanyń ereksheligi – polısıa qyzmetimen tikeleı baılanysty túrli sala mamandarynyń qatysýy boldy. Atap aıtqanda, jýrnalıser, blogerler, qoǵamdyq uıymdar men eriktiler qozǵalysynyń ókilderi, sondaı-aq halyqpen kún saıyn jumys isteıtin polısıa qyzmetkerleri bir ortaǵa jınaldy. Olardyń bári de bir másele – polısıadaǵy ıdeologıa men ımıj tóńireginde oı qozǵady.
Jıynǵa sondaı-aq İİM ókilderi, Polısıa departamentteri men İİM Almaty akademıasynyń basshylary men mamandary, qatysty.
Basty nazar kásibı etıka men polısıanyń bolashaq beınesin aıqyndaıtyn qundylyqtarǵa aýdaryldy. Máselen, tártipti qalaı qalyptastyrýǵa bolady, ortaq qyzmettik rýhty qalaı damytý qajet jáne qoǵamǵa polısıanyń ashyq ári dıalogqa daıyn ekendigin qalaı jetkizý kerek degen suraqtar talqylandy.
Konferensıa barysynda qyzmettik jaýapkershilik, azamattarmen ózara árekettestik, sondaı-aq polısıaǵa degen senimdi qalyptastyrýdaǵy buqaralyq aqparat quraldarynyń róli qyzý talqylandy.
Qatysýshylardyń aıtýynsha, búgingi polısıa jabyq kúıde jumys isteı almaıdy, ashyqtyq pen turaqty keri baılanys qajet.
Otyrysta İİM ókilderi atap ótkendeı, mınıstrlik ashyqtyq tájirıbesin belsendi damytyp keledi. Azamattarmen júzdegen kezdesýler, túrli jobalar, ýchaskelik pýnktterdiń nyǵaıýy, qoǵamdyq keńesterdiń jumysy, servıstik polısıa ortalyqtarynyń ashylýy – munyń barlyǵy polısıanyń qoǵamǵa jaqyndap, dıalogqa daıyn ekenin kórsetedi. Búginde ár óńirde halyqpen erkin pikir almasýǵa arnalǵan alańdar jumys istep tur.
"Búgingi konferensıanyń mańyzy zor. Óıtkeni munda júıe mamandary da, qoǵam ókilderi de, jýrnalıser de bir zalda bas qosty. Osyndaı ashyq áńgime bizge bir-birimizdi jaqsyraq túsinýge jáne damý joldaryn birge izdeýge múmkindik beredi", – dep atap ótti Akademıa bastyǵynyń orynbasary, polısıa polkovnıgi Janat Dılbarhanova.
Jıyn resmı baıandamalarmen ǵana shektelmeı, tájirıbeden alynǵan naqty mysaldar men usynystardy talqylaýmen erekshelendi. Qatysýshylardyń pikirinshe, osyndaı ashyq alańdar polısıa men qoǵamnyń bir tilde sóılesýine jáne ortaq maqsat – qaýipsizdik pen senimge birge qadam basýyna jol ashady.