Almatyda "Jaıaý júrginshi" jedel-profılaktıkalyq is-sharasy jalǵasýda.
Osy oraıda qalalyq polısıa departamentiniń qyzmetkerleri №28 jalpy bilim beretin mektepke arnaıy baryp, "Jas Saqshy" polısıa synybynyń oqýshylaryna jol qozǵalysy erejelerine arnalǵan ashyq sabaq ótkizdi.
Sabaq barysynda tártip saqshylary balalarǵa jolda júrý mádenıeti men qozǵalys erejeleriniń mańyzdylyǵyn qarapaıym ári qyzyqty túrde túsindirip, jaıaý júrginshilerdiń – sonyń ishinde balalardyń – qaýipsizdigin qamtamasyz etetin negizgi qaǵıdalarǵa toqtaldy.
Sharada oqýshylar belsendilik tanytyp, suraq-jaýapqa qatysyp, alǵan bilimderin bekitip, joldaǵy túrli oqys jaǵdaılardy durys taldaýdy úırendi.
– Sabaq barysynda balalarǵa kúndelikti ómirde kezdesetin jol qaýipteri týraly keńinen aıtyldy. Jaıaý júrginshiler men júrgizýshilerdiń jıi jiberetin qatelikteri de nazardan tys qalmady. Polıseıler joldy qalaı durys kesip ótý kerek ekenin, qoǵamdyq kólik kútip turǵanda qaýipsiz oryn tańdaýdyń mańyzdylyǵyn jáne jaıaý júrginshiler ótkelinde de saqtyq sharalaryn qaperde ustaý qajettigin jan-jaqty túsindirdi, – dedi Medeý aýdandyq polısıa basqarmasy ákimshilik polısıa bóliminiń bastyǵy Arman Ýsaev.
"Jas Saqshy" synyby – balalardyń quqyqtyq saýattylyǵyn arttyryp, qazaqstandyq polısıa qyzmetiniń erekshelikterin tanystyratyn biregeı joba. Osyndaı sabaqtar jasóspirimderge quqyqtyq bilim berip qana qoımaı, olardy jolda qaýipsiz júris-turys mádenıetine baýlıdy.
Almaty polısıasy balalardyń qatysýymen bolatyn jol-kólik oqıǵalarynyń aldyn alý maqsatynda profılaktıkalyq jumystardy júıeli túrde júrgizýde. Sondaı-aq tártip saqshylary ata-analardy da balalarǵa jolda ózin qaýipsiz ustaýdyń qarapaıym ári mańyzdy qaǵıdalaryn úıretýge shaqyrady.