İs-shara alty eldiń qatysýshylarynyń basyn qosady, olar ár túrli baǵytta kúresip, sheberlikterin kórsetedi.
Almatyda 15-18 tamyz aralyǵynda órt sóndirý-qutqarý sporty boıynsha jasóspirim uldar jáne qyzdar arasynda álem chempıonaty ótedi, dep habarlaıdy aqshamnews.kz
Bul týraly Óńirlik komýnıkasıalar qyzmetiniń alańynda chempıonatty uıymdastyrýshylar habarlady.
Tórt kún boıy sportshylar órtti sóndirý tájirıbesinde qoldanylatyn túrli synaqtar keshenin eńseretin bolady.
«Qazaqstandyq órt sóndirýshiler men qutqarýshylardyń sport federasıasy» qoǵamdyq birlestiginiń bas mamany Erkejan Tólegen Qazaqstannyń sporttyń osy túrin damytýǵa jáne nasıhattaýǵa barlyq múmkindikteri bar ekenin atap ótti.
«Qazirgi ýaqytta Qazaqstan Respýblıkasy uldar men jasóspirimder arasyndaǵy XIII álem chempıonatyn jáne órt-qutqarý sportynan qyzdar men jasóspirimder arasyndaǵy IX álem chempıonatyn ótkizýde úlken jaýapkershilikti óz moınyna aldy. Jalpy, bizdiń elimiz osyndaı deńgeıdegi is-sharany ótkizýde úlken tájirıbege ıe. Buǵan deıin, 2014 jáne 2021 jyldary biz erler men áıelder arasynda álem chempıonattaryn ótkizdik. 2018 jyly Almaty qalasynda biz erler men áıelder arasynda halyqaralyq jarystar ótkizdik. Biz alǵash ret Almaty qalasynda jasóspirimder men uldar, qyzdar men jasóspirimder arasynda álem chempıonatyn ótkizetin bolamyz. Sondaı-aq, oblystar men qalalar boıynsha sporttyq olımpıadalyq rezervtegi balalar jasóspirimder mektepterimen birlesip, 13 pen 18 jas aralyǵyndaǵy balalar aınalysatyn seksıalar bar», - dep bólisti ol.
Brıfıńke qatysqan Qazaqstan Respýblıkasy qyzdar men jasóspirim qyzdar quramasynyń órt sóndirý-qutqarý sporty boıynsha aǵa jattyqtyrýshysy Laýra Qulahmedova qyzdar men jasóspirimderdiń bul sport túri boıynsha sońǵy úsh jylda ǵana qatysyp kele jatqanyn aıtty.
«Jasóspirim qyzdar arasynda órt sóndirý - qutqarý sporty elimizde álem chempıonaty deńgeıinde ótedi. Bıyl biz úshinshi ret qatysamyz. Respýblıkada jasóspirim qyzdar arasynda órt sóndirý-qutqarý sporty endi ǵana qolǵa alynyp, damyp kele jatqandyǵyna qaramastan, bizdiń qyzdarymyzdyń daıyndyǵy men kórsetkishteri jaqsy», - dep tolyqtyrdy ol.
Órt-qutqarý sporty boıynsha QR qyzdar men jasóspirimder qurama komandasynyń múshesi, álem jáne QR chempıonattarynyń júldegeri Anastasıa Býnákına bul sport túrine bir jyl buryn kelgenin atap ótti.
«Jeńil atletıkadan jattyqtyrýshym meni osy sportqa shaqyrdy, óıtkeni men onymen burynnan aınalysyp kelgem. Kóptegen jasóspirim qyzdar jattyqtyrýshylarynyń shaqyrýymen keldi. Men bul sportpen bir jyldan astam ýaqyt aınalysyp kelemin. Biz jattyǵamyz, daıyndalamyz, jaqsy nátıje kórsetemiz», - dedi ol.
Brıfıńtiń basqa qatysýshylary da óz oqıǵalarymen bólisti. Órt sóndirý - qutqarý sporty boıynsha QR jasóspirimder men jas jigitter qurama komandasynyń múshesi, 100 metrlik kedergiler jolaǵy boıynsha jeke birinshilikte álem chempıonattarynyń qola júldegeri Sarýar Maýlanov sportqa óziniń úlken aǵasyn úlgi tutyp kelgen.
«Men bul sport týraly aǵamnan bildim, meni osy sportqa ákelgen ol dep aıtýǵa bolady. Men de aǵam sıaqty júgirýmen aınalysamyn. Meni qyzyqtyrdy, sodan beri aıtarlyqtaı jetistikterge jettim», - dedi ol.
Taǵy bir sportshy, órt sóndirý - qutqarý sportynan QR jasóspirimder men jas jigitter qurama komandasynyń múshesi, 100 metrlik kedergiler jolaǵy boıynsha rekordshy, álem chempıonattarynyń kúmis júldegeri Serikov Abylaı bul sport túrimen 11 jasynda aınalysa bastaǵan.
Búginde elimizde órt sóndirý - qutqarý sporty boıynsha 20 erler, 14 áıelder jáne 16 jasóspirimder komandasy bar.
Chempıonat tórt baǵyt boıynsha ótkiziledi, olardyń ekeýi jeke birinshilik bolsa, ekeýi - komanda bop saıysqa túsý.
Birinshi baǵyt - oqý munarasynyń terezesine baspaldaqtarmen kóterilý.
Ekinshisi - kedergileri bar jolaqtyń 100 metrin eńserý.
Úshinshisi - 4h100 metrlik órt sóndirý estafetasy.
Tórtinshisi - órt sóndirý motopompasynan jaýyngerlik qanat jaıý.
Chempıonatty uıymdastyrýshylar atap ótkendeı, sportshylar ár jattyǵýdy neǵurlym tez oryndasa, nátıje de soǵurlym jaqsy bolady.
Chempıonattyń ashylý saltanaty 15 tamyzda saǵat 19.00-de Ortalyq stadıonda ótedi. Kórermenderdi arnaıy otty effektilerge toly shoý, estrada juldyzdarynyń qatysýymen konsert, sondaı-aq, qutqarýshy sportshylardyń jarqyn jáne jandy qoıylymdary men qatysýshy komandalardyń sherýi kútedi.
Uıymdastyrýshylar Almaty qalasynyń turǵyndary men qonaqtaryn sportshylardy qoldaýǵa shaqyrady.