Táýelsizdiktiń 30 jyldyq mereıtoıy qarsańynda Almatyda respýblıkalyq «Igi ister» jáne «Mektepke jol» marafondary júrip jatyr.
Marafondar aıasynda Naýryzbaı aýdanynyń ákimdigi «Qýanysh syıla» aksıasyn ótkizdi. Igi shara barysynda 30 kóp balaly jáne az qamtylǵan otbasy mektepke jabdyqtalyp, búldirshinderge forma, sómke, sporttyq zattar, oqý quraldary jáne táttiler tartý etildi, dep habarlaıdy Almaty-akshamy.kz Almaty.tv-ge silteme jasap.
«Naýryzbaı ákimdigine kóp raqmet. Biz mynandaı kómekti birinshi ret alyp jatyrmyz. Biraz jaqsy zat alyp kelipsizder, bul da kómek bizge. Sol úshin qýanyshtymyz, raqmet», – dedi Naýryzbaı aýdanynyń turǵyny Álıma Qojaǵulova.
Bir ereksheligi, bıyl aýdandyq ákimdikte qyzmet isteıtin jas mamandar 1 mıllıon teńge qarajat jınap, ıgi sharany óz kúshimen ótkizgen. Qaıyrymdylyq aksıasy 26 tamyzǵa deıin jalǵasatyn bolady. Jalpy, jyl basynan beri aýdanda 36 aksıa ótken. Ony uıymdastyrýshylar jyl sońyna deıin taǵy 70 shara ótkizýdi jospardap otyr.
«Buryn ákimdik tarapynan aýdandaǵy mesenattardy, demeýshilerdi uıymdastyryp, aýdandaǵy az qamtylǵan otbasynyń balalaryna demeýshilerdiń qoldaýymen osyndaı sharalar atqarylǵan. Al, jas mamandardyń uıymdastyrýymen bul birinshi ret ótkizilip otyr», – dedi Naýryzbaı aýdanynyń mádenıet jáne tilderdi damytý bóliminiń bas mamany Farıza Eskendirova.