Belgıada bıyl qyrkúıekten bastap karantın jeńildetilmek.
Belgıada vaksınalaý naýqany qarqyndy júrip jatyr. Bul óz kezeginde el bıligine koronavırýspen baılanysty jarıalanǵan karantın talaptaryn jeńildetýge múmkindik jasap otyr, dep habarlaıdy Almaty-akshamy.kz QazAqparat-qa silteme jasap.
«Osy ýaqytta 7 mln 796 myń belgıalyq koronavırýsqa qarsy vaksına aldy. Bul - el halqynyń jasy 18-den asqan turǵyndarynyń 80 paıyzy. «Búgingi tańda eresek 10 adamnyń segizi vaksına alǵan. Osylaısha biz «jazǵy jospardy» asyra oryndadyq jáne bıylǵy jyldyń 1 qyrkúıeginen bastap bostandyqqa mańyzdy qadam jasaımyz», - dedi Belgıanyń Premer-Mınıstri Aleksandr De Kroo.
El úkimetiniń janyndaǵy Konsýltatıvtik komıtettiń (sarapshylar) kezekti otyrysynda 1 qyrkúıekten bastap tómendegideı talaptar engiziletin bolady:
- Kafe men meıramhanalarda sanıtarlyq talaptar jeńildetiledi. Tek zalda júrgende ǵana (dárethanaǵa barǵanda, ústelden ústelge aýysqanda, t.s.s.) betperde taǵý mindetti. Ózge shekteýlerdiń barlyǵy alyndy. Buǵan qosa qoǵamdyq tamaqtaný oryndarynyń jumys ýaqyty karantın talaptarymen rettelmeıdi; - túnde isteıtin dúkenderdiń jumys ýaqytyna shekteý qoıylmaıdy; - otbasylyq sharalarǵa keletin adamdar sanyna shekteý joq; - belgıalyqtar endi úıine qansha adam jınasa da ózderi biledi. - Flandrıada endi qashyqtan jumys isteý usynylmaıdy, al Brússelde bul usynys áli kúshinde; - 1 qazannan bastap túngi klýbtar jumys isteı beredi; - Turǵyndar mindetti túrde araqashyqtyqty saqtap maska taǵýy tıis qoǵamdyq oryndardaǵy (qoǵamdyq kólik, stansıalar, dúkender, kitaphanalar, sot, dinı uıymdar) sanıtarlyq normalar saqtalady.
Sondaı-aq Belgıa Premer-Mınıstri eldiń barlyq óńirleriniń ákimshilikterin halyq sanynyń keminde 70 paıyzynyń vaksına alýyn qamtamasyz etýge shaqyrdy.
«Adamdardy neǵurlym kóbirek vaksınalaý úshin maqsatty sharalar qoldanylady», - dedi A.Kroo.