Jyr alyby Jambyldyń týǵanyna - 175 jyl.
Qala kúni men Jambyl Jabaevtyń týǵanyna 175 jyl tolý mereıtoıyna oraı qalada arnaıy is-sharalar ótti. «Júz jasaǵan Jambyl» is-sharasy Open air jobasy aıasynda ótkizildi, dep habarlaıdy Almaty-akshamy.kz.
Basty maqsat – qazaq halyq poezıasynyń áıgili tulǵasy, óleń sózdiń dúldili Jambyl Jabaevtyń ómiri men shyǵarmashylyǵyn qazirgi jastarǵa nasıhattaý. Joba aıasynda Jabaev eskertkishi aldyndaǵy ashyq alańda oqýshylar aqynnyń óleńderin oqyp, arnaıy alǵys hattarmen marapattaldy.
«Bul is-sharanyń Almaty qalasynyń ákimdigine qarasty rýhanı jańǵyrý baǵdarlamasy aıasynda rýhanı jańǵyrý memlekettik mekemesi tikeleı uıymdastyryp jatqany shynymende janǵa jylý beretin, rýhanı álemdi bir bıik shyńǵa shyǵaratyn jaqsy bir is-shara ótip jatyr», – dedi qalalyq mádenıet basqarmasy basshysynyń orynbasary Danıar Álıev.
Sondaı-aq, Ǵ.Músirepov teatrynyń aldynda ashyq alań sahnasynda «Jambyl meniń jáı atym, halyq meniń shyn atym» atty jastar arasynda aıtys ótip, «Júz jasaǵan júrekten» atty teatrlandyrylǵan qoıylym kórsetildi.
Uıymdastyrýshylardyń aıtýynsha, mundaı is-sharalar aldaǵy ýaqytta da óz jalǵasyn tabady.