Memleket basshysynyń Qazaqstan halqyna Joldaýynda 2025 jyldy «Jumysshy mamandyqtar jyly» dep jarıalaǵannan keıin, bul salaǵa erekshe nazar aýdarylyp, jastardyń kásibı bilim alyp, jan-jaqty damýyna basymdyq berile bastady. Búginde Almaty qalasynyń ózinde júzden astam tehnıkalyq jáne kásiptik bilim berý (TjKBB) uıymy bar. Olar memlekettiń tapsyrysy boıynsha maman daıarlap, el ekonomıkasynyń damýyna úles qosýda.
Álemde 16 qazan kúni Halyqaralyq Nan kúni atap ótiledi. Osyǵan oraı, Almaty memlekettik bıznes kolejinde «Naýbaıshy sheberligi» quzyrettiligi boıynsha «NAN-FEST» qalalyq kásibı sheberlik baıqaýy ekinshi ret uıymdastyryldy. Oǵan Almaty qalasyndaǵy 6 kolejdiń 10 stýdenti, jumys berýshiler, «Atameken» kásipkerler palatasy men Bilim basqarmasynyń ókilderi qatysty.
Baıqaýdy Almaty memlekettik bıznes kolejiniń basshysy Aınur Qýanyshqyzy ashyp, nannyń mańyzdylyǵy týraly aıtty:
– Halqymyzda «Nan – astyń atasy», «Nan bolsa, án de bolady» degen támsilder bar. Bul baıqaý arqyly jastarǵa nanǵa degen qurmetti arttyryp, eńbektiń qadirin úıretkimiz keledi. Jumysshy mamandyǵynyń bedelin kóterý – basty maqsatymyz, – dedi Aınur Qýanyshqyzy.
Almaty memlekettik bıznes koleji «Jas maman» jobasy aıasynda ıtalıalyq qurylǵylardy alyp, naýbaıshy mamandaryna arnalǵan jabdyqtarmen jumys isteýdi jeńildetti. Baıqaý úsh kezeń boıynsha ótti, ádilqazylar alqasy men óndiris ozattary qatysýshylardyń sheberlikterin baǵalady.
«NAN-FEST»-tiń Bas júldesin «Almaty tehnologıalyq-ekonomıkalyq kolejiniń» stýdenti Álisher Shaımardanov jeńip aldy. Birinshi oryndy «Almaty Tehnologıalyq kolejiniń» stýdenti Aıqyn İlesbaı, ekinshi oryndy «Almaty Ekonomıkalyq kolejiniń» stýdenti Alına Altaeva men Almaty Memlekettik Bıznes kolejiniń stýdenti Ilás Srabaı ıelendi. Úshinshi oryndy «Almaty ekonomıkalyq kolejiniń» stýdenti Arýna Amangeldi men «Týrızm jáne Qonaqjaılylyq ındýstrıasy» kolejiniń stýdenti Kamıla Gýrova aldy.
Baıqaýdyń maqsaty – nannyń qoǵam men adam ómirindegi mańyzdylyǵyn kórsetý jáne jumysshy mamandyǵynyń bedelin arttyrý. Baıqaý jeńimpazdarynyń jetistikteri men ozyq is-tájirıbesi basqa oqý oryndarynda da nasıhattalady. Uıymdastyrýshylar «NAN-FEST» baıqaýyn respýblıkalyq deńgeıde ótkizýdi josparlap otyr.
