Almaty qalasynyń segiz aýdanyndaǵy referendým ýchaskelerinde saıası naýqan áli de jalǵasyp jatyr. Olardyń arasynda mektep bitirgen túlek te daýys berdi, dep habarlaıdy Almaty-akshamy.kz Almaty.tv-ge silteme jasap.
Basym kópshiliginde turǵyndar kelip, búletenge belgi qoıyp úlgergen. Odan bólek, Bostandyq pen Almaly aýdanynyń turǵyndary da saıası naýqannan qalys qalmady.
Dılnaz Bólbaı – bıyl ǵana mektebin aıaqtap, kámelet jasqa toldy. Búgingi jaýapkershilikti ol bir kisideı sezinedi. Sebebi, tańǵy saǵat 8:00-den qalmaı, qaladaǵy №270 referendým ýchaskesine kelip, óz tańdaýyn jasapty.
«Men búgin óz tańdaýymdy jasadym. Bul bárimiz úshin mańyzdy dep oılaımyn», – dedi qala turǵyny Dılnaz Bólbaı.
Al, Rymǵaısha Baqaeva – Áýezov aýdanynyń turǵyny. Bıyl seksenniń seńgirine shyqqan egde kisi de búgingi saıası naýqannan qalys qalmady. Aýdanda 100 referendým ýchaskesi ornalasqan. Jalpy aýdan boıynsha 200 myńǵa jýyq turǵyn daýys berýge quqyly.
«Búgin men de kelip daýys berdim. Men bul saıası naýqanǵa qatysý boryshym dep bilemin», – dedi qala turǵyny Rymǵaısha Baqaeva.
Daýys berý ýchaskelerinde múmkindigi shekteýli jandar úshin de barlyq jaǵdaı jasalǵan. Estý qabileti nashar jandar úshin, materıaldyq tehnıkalyq baza tolyǵymen qamtamassyz etilgen. Qulaqqap bar, noýtbýk ornynda, daýys berý prosesimen tanysýǵa múmkindik bar. Al, №254 ýchaske Ulttyq kitaphanada ornalasqan. Mundaǵy tizim boıynsha 1739 adam tańdaý jasaýǵa quqyly. Kitaphana qyzmetkerleri kelgen turǵyndardy qazaqtyń kúbirlegen kúıimen qarsy alyp jatty.
«Búgingi kún óte mańyzdy, Ata zańymyzǵa ózgerister engizilip jatyrmyz. Bul alǵashqy qadam», – dedi qala turǵyny Qaıyrtaı Shegirov.
Aıta keteıik, Almatyda barlyǵy 574 refendým ýchaskesi jumys isteıdi. Almaty elimizdegi daýys berýshileri jaǵynan eń kóp qala. Qalalyq referendým komısıasynyń tóraǵasy Janna Asanovanyń habarlaýynsha 1 mln 126 myńnan astam adam búgin óz tańdaýyn jasaýǵa quqyly.