«Medeýdiń» aýqymdy jańǵyrtylýy: ekopark, ashyq aspan astyndaǵy baseın jáne demalystyń jańa múmkindikteri
Almatyda biregeı nysan – bıik taýly sport kesheni «Medeýdi» jańartý jumystary bastaldy, - dep habarlaıdy Aqshamnews.kz.
Jobanyń basty maqsaty – nysannyń sáýlettik jáne tarıhı kelbetin saqtaı otyryp, zamanaýı, energıa únemdeıtin ári halyqaralyq standarttarǵa saı keńistik qalyptastyrý. Bul týraly Qala qurylysyn baqylaý basqarmasynyń ókilderi habarlady.
Qazir daıyndyq kezeńi júrip jatyr, aldaǵy ýaqytta qurylys aımaǵy qorshalyp, negizgi jumystar bastalady. Joba aıasynda muz aıdynyna arnalǵan jańa tońazytqysh júıesi ornatylady, ınjenerlik komýnıkasıalar tolyq jańartylyp, keshen gazben qamtamasyz etiledi. Muzdyń sapasy men jaǵdaıyn naqty ýaqyt rejıminde baqylaıtyn jasandy ıntellekt júıesi energıa tutynýyn 25%-ǵa deıin azaıtýǵa múmkindik beredi. Sondaı-aq, kórermenderge arnalǵan jyly ári jeke retteletin oryndyqtar qoıylady.
Shyǵys qanattaǵy qonaq úı qazirgi nómirler qoryn saqtaı otyryp, «tórt juldyz» standartyna saı qaıta jobalanady. Sonymen birge sportshylar men kelýshilerge arnalǵan zamanaýı ońaltý ortalyǵy ashylady. Onda saýna, massaj bólmeleri jáne shuǵyl ári profılaktıkalyq kómek kórsetýge arnalǵan medısınalyq bólim jumys isteıdi.
Keshen aýmaǵynda «3D» tujyrymdamasyna negizdelgen ınteraktıvti mýzeı ekspozısıasy jasaqtalady. Ol zamanaýı mýltımedıalyq jáne kórme jabdyqtarymen tolyq qamtylady. Batys trıbýnada aýmaǵy 900 sharshy metr bolatyn kofehanalary men demalys oryndary bar keń terasa paıda bolady. Al keshen aldyndaǵy keńistikte, jer asty avtoturaǵynyń ústinde SUN-DECK atty demalys aımaǵy qurylyp, ol qala turǵyndary men qonaqtary úshin kópfýnksıonaldy qoǵamdyq alańǵa aınalady.
Zamanaýı sporttyq jáne saýyqtyrý keshenin jasaýǵa erekshe kóńil bólingen. Burynǵy mashına zalynyń mańynda kólemi 25×15 metr, jyly sýy bar ashyq baseın salynady. Kelýshilerdiń yńǵaıy úshin trıbýna men qabyldaý bólmesi, kıim aýystyratyn bólmeler jáne t.b. qyzmet kórsetý ǵımaraty qarastyrylǵan. Bul jańa baseın jyl boıy jumys istep, qala turǵyndary men týrıserge taý baýraıynda taza aýada júzý múmkindigin usynady.
Keshenniń aınalasynda serýen joldary bar erekshe ekopark salý josparlanǵan. Ol jerden jasandy sarqyrama, Kishi Almaty ózeni men taýdyń ásem kórinisin tamashalaýǵa bolady. Negizgi nysandardy jáne jańa demalys aımaqtaryn baılanystyratyn shyǵys jáne batys baǵyttarda júrginshilerge arnalǵan eki kópir salynady.
Sondaı-aq, jergilikti klımatqa tózimdi jańa aǵashtar men butalar egilip, búkil aýmaq zamanaýı jaryqtandyrý jáne sáýlettik shamdarmen bezendiriledi. Múmkindigi shekteýli jandarǵa yńǵaıly bolýy úshin eki jolaýshy jedel saty ornatylady.
Bul jumystar 2027 jyldyń 4-shi toqsanyna tolyq bitedi dep josparlanyp otyr.