Ótken demalys kúnderi Almaty qalasynda jol qozǵalysy erejelerin óreskel buzý faktilerin anyqtaýǵa baǵyttalǵan keń aýqymdy reıd uıymdastyryldy.
Jergilikti polısıa qyzmetiniń málimetinshe, aldyn alý sharasy barysynda mas kúıinde kólik basqarǵan 27 júrgizýshi ustaldy, dep habarlaıdy aqshamnews.kz.
Sot olardyń árqaısysyna qatysty ákimshilik jaza taǵaıyndap, keminde 15 táýlikke qamaýǵa alý jáne 7 jylǵa kólik basqarý quqyǵynan aıyrý týraly sheshim shyǵardy.
Almaty qalalyq polısıa departamentiniń jergilikti polısıa qyzmeti basqarmasynyń basshysy Serik Shýmaevtyń aıtýynsha, kólikti mas kúıinde tizgindeý aýyr zardaptarǵa ákeletin quqyq buzýshylyqtardyń biri.
- Tájirıbe kórsetkendeı, esirtki nemese alkogól qoldanǵan júrgizýshiler áli de kezdesedi. Mundaı jaǵdaılarda jıi kezdesetin senarı: bir top adam birge ishimdik ishedi, sodan keıin júrgizýshi kólikpen úıine qaıtýǵa sheshim qabyldaıdy. Ol ózine tym senimdi bolyp, esh qıyndyqsyz jete alatynyna senedi. Alaıda ókinishke qaraı, mundaı jaǵdaılar kóbinese aýyr jol-kólik oqıǵalarymen aıaqtalyp jatady. Mas júrgizýshiler toqtatylǵan kezde, olar túrli syltaý aıtyp, jaýapkershilikten qutylýǵa tyrysady. Biri dári ishkenin alǵa tartsa, endi biri tek az ǵana jol júrgenin aıtady. Biraq bul jerde eshqandaı aqtalý bolmaýy kerek. Eger adam mas bolsa, ol rólge otyrmaýy tıis. Áıtpese, qaıǵyly jaǵdaı oryn alýy múmkin. Bul – ómirdiń ashshy shyndyǵy: mas júrgizýshi – qylmysker", – dep atap ótti ol.
Demalys kúnderi aldyńǵy sheptegi polısıa bólimsheleri 112 jol qozǵalysy erejesin buzý deregin anyqtady. Onyń ishinde: 27 – kólik quralyn mas kúıinde basqarý, 1 – júrgizý quqyǵy joq adamnyń kólik júrgizýi, 16 – qarama-qarsy qozǵalys jolaǵyna shyǵý, 20 – manevr jasaý erejesin buzý, 10 – apattyq jaǵdaı týyndatý, 20 – kólikti turaqqa qoıý erejesin buzý, 2 – memlekettik tirkeý nómiri joq kólik quralyn basqarý. Almaty qalalyq polısıa departamenti kólik júrgizýshilerin jol qozǵalysy erejelerin qatań saqtaýǵa shaqyrady. Mas kúıinde rólge otyrý – óz ómirińe de, ózgeniń ómirine de qaýip tóndiretin aýyr quqyq buzýshylyq.