Jambyl atyndaǵy fılarmonıa 90 jyldyǵyn halyqaralyq jobamen keń aýqymda atap ótpek
Jambyl atyndaǵy Qazaq memlekettik akademıalyq fılarmonıasynda 90 jyldyq mereıtoıǵa oraı bir jyldyń ishinde 195 konsert ótkeli otyr. Bul týraly Óńirlik komýnıkasıalar qyzmetinde ótken pres-konferensıada jan-jaqty aıtyldy, dep habarlaıdy aqshamnews.kz
Fılarmonıanyń dırektory Aqan Abdýalıevtyń aıtýynsha, bul mereıtoı – elimizdiń úlken saz sahnasyndaǵy tarıhı sabaqtastyqty ǵana kórsetip qoımaı, mádenı túrde jańǵyryp jatqanyn da pash etpek.
«90 jyldyq mereıtoı — kez kelgen mádenıet oshaǵynyń arǵy-bergi tarıhyndaǵy aýyz toltyryp aıtatyndaı ýaqyt. Ǵasyrǵa tatıtyn tarıhy bar Jambyl atyndaǵy Qazaq memlekettik akademıalyq fılarmonıasy ulttyq mýzyka men mádenıettiń damýyna ólsheýsiz úles qosyp kele jatqan qazaq óneriniń altyn qazyǵy ispetti. Mereıtoıdyń aıasynda ótetin konsertter, ártúrli is-sharalar qalanyń mádenı ómirindegi tyń jańalyq bolady dep úmittenemiz», – dedi Aqan Abdýalıev.
Jyl basynan beri fılarmonıa balalar úıinde, qarttar ortalyǵy men erekshe balalarǵa arnalǵan basqa da mekemelerde qaıyrymdylyq maqsatyndaǵy osyndaı birneshe konsert ótkizip úlgeripti.
Urpaq sabaqtastyǵy jobasynyń aıasynda qańtar aıynan beri qaladaǵy mýzykalyq oqý oryndarynyń stýdentterimen, oqýshylarymen birlesip konsert te ótkizip jatyr. Júrgenov atyndaǵy Óner akademıasynyń stýdentteri men O. Tańsyqbaev atyndaǵy sándik jáne qoldanbaly óner kolejiniń stýdentteri qatysqan «Fılarmonıa – jas sýretshilerdiń kózimen» dep atalatyn kórkem plener sonyń biri.
- Fılarmonıa men B. Baıqadamov atyndaǵy Hor kapelasynyń 90 jyldyǵy men Nurǵısa Tilendıevtiń 100 jyldyǵynan sýretshiler de qalys qalmady. Olardyń qolynan shyqqan kartınalar fılarmonıanyń týra kireberisine qoıyldy.
- B. Baıqadamov atyndaǵy Hor kapelasy uıymdastyrǵan «Gúl Almaty. Flower City» dep atalǵan festıvál-konsert erekshe oqıǵanyń biri boldy. Fılarmonıanyń 90 jyldyǵy men Qazaqstan halqy Assambleıasynyń 30 jyldyǵynda festıvál alǵash ret balalar men jasóspirimderdiń hor ujymynyń basyn qosty.
- Balalar men jastar jaǵy da nazardan tys qalǵan joq. 1 maýsym kúni qalada jas ártister qatysqan úlken konsert bolyp ótti. Oqýshylardy akademıalyq mýzykaǵa tartýdy kózdeıtin mundaı tanymdyq konsertterdi jyldyń sońyna deıin úzbeı ótkizbek. Qazir 2025 jylǵy is-sharaǵa mektepter men ata-analar uıymynan kóp ótinish kelip túsken.
Shetelde bilim alyp qaıtqan qazaqstandyq jas ánshiler XX ǵasyrdaǵy kompozıtorlardyń sımfonıalyq shyǵarmasyn oryndaıtyn «XX–25» festıvali maýsym aıyndaǵy eń qyzyqty sát. T. Ábdirashev atyndaǵy QR memlekettik akademıalyq orkestriniń kórkemdik jetekshisi ári bas dırıjeri Qanat Omarov festıváldiń konsepsıasy týraly bylaı deıdi:
«Festıvál kópshilikke XX ǵasyr men qazirgi kezdegi kompozıtorlardyń sımfonıalyq shyǵarmasyn usynyp, ótken júzjyldyqtaǵy kórkemdik izdenister men ıdeıalardyń áli de ózekti ekenin atap ótpek. Shetelde oqyp, sol jaqta jumys istep jatqan qazaqstandyq jas mýzykanttardyń osy is-sharaǵa kelip qatysqaly otyrǵany da óz aldyna bir jańalyq. Olar halyqaralyq arenada tanylyp, endi el ishinde óner kórsetip, jas mýzykanttarǵa tálim berý úshin birtindep elge oralyp jatyr», – dep atap ótti Qanat Omarov.
Festıváldi 6 maýsym kúni skrıpkashy, halyqaralyq baıqaýlardyń laýreaty Merýert Kármenova (Belgıa) ashpaq. Odan keıin pıanıser Botagóz Aıǵalqaeva men Alıar Ótetileý óner kórsetedi. Osylaısha, 21 maýsymǵa deıin XX ǵasyrdaǵy sımfonıalyq shyǵarmalardy qazaqstandyq ónerpazdar erekshe naqyshpen oryndap shyǵatyn birneshe konsert ótedi.
Aqan Abdýalıevtyń aıtýynsha, fılarmonıa jyl saıyn Qala kúnine arnap ártúrli alańda úsh kúndik konsert ótkizip turady. Mundaı is-sharalar Almatynyń mádenı ómirin túrlendirip, qala turǵyndary da ony erekshe yqylaspen qabyldaıdy.
Qyrkúıek aıynda otandyq jáne sheteldik mýzykanttar kelip qatysatyn 90-shy konsert maýsymy bastalady. Qonaqtardyń arasynda – Aıman Musahodjaeva, Jánıa Áýbákirova, dırıjer Krıstof Mangý (Fransıa), kompozıtor Rıkkardo Páchentını (Italıa), Dıan Chobanov (Bolgarıa) men basqalary bolmaq. Bıyl óner kórsetip úlgergen ártisterdiń qatarynda Alekseı Pýzakov (Reseı), Taır Beısheev (Qyrǵyzstan), Aıdar Torybaev (Ýkraına), Erjan Qulybaev ta (Ispanıa) bar.
Qarasha aıynda Respýblıka saraıynda fılarmonıanyń 341 ártisi qatysatyn úlken gala-konsert ótedi. Budan bólek, ár ujym men fılarmonıanyń solıserine arnalǵan 60 mınýttyq vınıl plasınkasy qoıylyp, mekemeniń tarıhyn baıandaıtyn kitaptyń tusaýy kesilmek.
Fılarmonıa Uly Otan soǵysyndaǵy Jeńistiń 80 jyldyǵy men Shámshi Qaldaıaqovtyń 95 jyldyǵyn, kompozıtor Ábilahat Esbaevtyń 100 jyldyǵyn, Evgenıı Brýsılovskıı men aqyn Tumanbaı Moldaǵalıevtiń 120 jyldyǵyn da eskerýsiz qaldyrǵan joq. Olarǵa da konsert arnamaq.
«Osylaısha, fılarmonıanyń 2025 jylǵy konsertteri Qazaqstannyń mádenı ómirine tyń jańalyq alyp kelgeli otyr. Kórnekti qaıratkerlerdiń mereıtoıymen shektelip qalmaı, olardy tarıhtan tálim alý úshin Jeńistiń 80 jyldyǵyna da arnap otyr. Osyndaı festıváldar, balalardyń óneri men kásibı mamandardyń konserti arqyly fılarmonıa óner men mádenıettiń damýyna ózinshe úles qosa bermek», – dep aıaqtady óz sózin Aqan Abdýalıev.
Almatylyqtar men qalanyń talǵampaz qonaqtaryn mereıtoıǵa arnalǵan osyndaı aıtýly is-sharaǵa kelip qatysýǵa shaqyrdy.