Qalalyq kógaldandyrýshylar jasyl jelekterdi otyrǵyzý jumystaryn júrgizip jatyr, dep habarlaıdy almaty-akshamy.kz https://t.me/almaty_akimat/19487 silteme jasap.
Búginde 23 459 aǵash otyrǵyzyldy: Medeý aýdanynda – 2000 birlik, Jetisý aýdanynda - 3070, Túrksib aýdanynda - 3900, Almaly aýdanynda - 7000, Áýezov aýdanynda - 2489, Bostandyq aýdanynda - 3500, Alataý aýdanynda - 1500. Naýryzbaı aýdanynda 10 myń aǵashty jappaı otyrǵyzý 30 qazanda bastalady, qazirgi ýaqytta otyrǵyzý úshin oryndar daıyndalyp jatyr (shuńqyrlar qazylady).
Bıyl Almaty qalasynyń jasyl qory 320 myń jasyl jelekpen tolyǵady, onyń 22 myńy kóktemde otyrǵyzyldy, 298 myńy kúzge josparlandy.
Bas botanıkalyq baq pen ǵylymı agrarlyq ýnıversıtet mamandarynyń usynysymen kósheler boıyna jalpaq japyraqty shegirshin, emen, úıeńki, shaǵan, terek, al saıabaqtar men skverlerge - sánaǵash, qaıyń, akasıa, shyrsha jáne jemis (alma, shıe, almurt, órik) aǵashtary otyrǵyzylyp jatyr. Aǵashtyń bul túrleri tyǵyz ósip, saıaly kóleńkege aınalyp, lastanǵan aýany jaqsy ustaıdy.
Kóshetterdi jaqsylap sýarý úshin otyrǵyzý oryndarynda avtomatty sýarý júıeleri ornatylǵan. 2023 jyly qabyldanǵan jasyl jelekterdi kútip-baptaý jáne qorǵaý erejesinde otyrǵyzylǵan aǵashtarǵa 3 jylǵa deıin kútim jasaýdy qamtamasyz etý jetkizýshilerge júktelgen. Jasyl jelekterdi tıimdi sýarý jáne kóshetterdiń tamyrlanyp ósip ketýi úshin bıyl sý jınaǵyshtyń qurylysy men rekonstrýksıalaý jumystary bastaldy.