«Almaty Tazalyq» komýnaldyq kásipornynyń qys mezgiline daıyndyǵyn polısıa qyzmetkerleri tekserdi.
Kestege sáıkes, tehnıka, qural-jabdyqtar, jumys ınventarlary men shyǵyn materıaldary, tazalaý jabdyqtarynyń baǵyttary, sondaı-aq, qyzmetkerler quramy tekserildi, dep habarlaıdy Almaty-akshamy.kz Polisia.kz-ke silteme jasap.
«Maqsat – jol qaýipsizdigin qamtamasyz etý, jol-kólik oqıǵalaryn azaıtý jáne jaýyn-shashyn kezinde azamattarǵa qaýipsiz jaǵdaı jasaý. Tekserý kezinde barlyq núanstar eskeriledi – tipti aımaqtarǵa sheberlerdi taǵaıyndaý, qosymsha qyzmetkerlerdi tartý týraly kelisim-sharttar, tazalaý jabdyǵynyń bolýy jáne tazalaý jabdyqtaryna qyzmet kórsetýge arnalǵan kelisimsharttar. Komýnaldyq kásiporyndardy tekserýdiń birinshi kezeńi qarashanyń 15-ne deıin júrgiziledi», – dedi Almaty qalalyq PD Ákimshilik polısıa basqarmasy bastyǵynyń orynbasary Bolatbek Baıatanov.
“Almaty tazalyq” KMK dırektory Ádilet Toqtasynovtyń aıtýynsha, qys mezgiline tolyq daıyn.
«Bul jumysqa 714 tehnıka jumyldyrylady, onyń 94-i merdigerler arqyly. Joldardaǵy jaǵdaı ýshyǵyp ketse, jumysqa qosymsha bir myń adamdy tartýǵa múmkindigimiz bar», – dedi ol.