Almatyda 29 naýryzdan bastap ormandy alqaptarda, qala saıabaqtary men gúl baqtarda kenelerge qarsy dezınseksıalyq óńdeý jumystarynyń birinshi kezeńi bastalady. Bul týraly Almaty qalasynyń sanıtarıalyq-epıdemıologıalyq baqylaý departamenti basshysynyń orynbasary Ásel Qalyqova aıtty, dep habarlaıdy Almaty-akshamy.kz QazAqparatqa silteme jasap.
«Almaty qalasynda 29 naýryzdan bastap jalpy aýdany 2424,54 ga quraıtyn ormandy alqaptarda, qala saıabaqtary men gúl baqtarda kenelerge qarsy dezınseksıalyq óńdeý jumystarynyń birinshi kezeńi bastalady. Óńdeý jumystary 8 ormandy alqap (1904,924 ga), 144 qala saıabaqtary men skverlerde (519,616 ga) júrgiziledi jáne aýa-raıyna baılanysty qurǵaq, jaýyn-shashynsyz kúnderi kestege sáıkes 29 naýryzdan 28 sáýirge deıin júrgiziledi. Kene ensefalıtine qarsy kúrestiń nátıjesi sapaly bolýy úshin óńdeý jumysy eki kezeńde júrgiziledi. Ekinshi kezeń mamyr, maýsym aılarynda júrgiziletin bolady», - dedi Ásel Qalyqova.
Dezınseksıalyq is-sharany qalalyq sanıtarlyq-epıdemıologıalyq baqylaý qyzmetiniń mamandarynyń tikeleı baqylaýymen «Almaty qalasynyń dezınfeksıa ortalyǵy» fılıaly atqarady. Jasaqtalǵan dezbrıgadalar qajetti quraldarmen, kóliktermen jáne jeke bas qorǵanysh zattarymen jabdyqtalǵan.
«Kene ensefalıtine qarsy dezınseksıalyq óńdeý jumystaryn júrgizý úshin «Favorıt» akarısıdtik preparaty qoldanylady. Preparat az ýytty jáne qaýiptiligi tómen sanatqa jatqyzylady. Kenelermen kúresý úshin qoldanylatyn dozalar eń az jáne adamdar men janýarlar úshin qaýipsiz bolyp tabylady. Óńdeý jumystary tańǵy ýaqyttarda júrgiziledi. Óńdeletin aýmaqtardyń shekaralarynda «Kenege qarsy óńdeý júrgizilýde» eskertý habarlamalary bar taqtalar ornatalady», - dedi spıker.
Kenege qarsy óńdeý jumystaryna baılanysty dáriger qala turǵyndaryna kelesi saqtyq sharalaryn saqtaýǵa shaqyrdy.
«Akarısıdty preparattyń eritindisin denege nemese kıimge tıgizip almas úshin kenege qarsy dezınseksıalyq óńdeý jumystary júrgizilgen jerlerden qashyqtaý júrý kerek, jerge shashyraǵan preparattar qurǵaǵansha úı janýarlaryn óńdeý jumystary júrgizilgen aımaqqa jibermeý kerek, óńdeý jumystary júrgizilgen jerlerden 40 kún boıy sańyraýqulaq, shóp nemese jıdekterdi jınaýǵa, paıdalanýǵa bolmaıdy, qala turǵyndary men qonaqtary kenege qarsy óńdeý kezinde jáne odan keıin úsh kún ishinde saıabaqtarǵa, gúl baǵyndarǵa jáne tabıǵı oshaqtarǵa barmaýy kerek», - dep eskertti Ásel Qalyqova.