Baǵdarlamaǵa ótinim qabyldaý kezeńi 31 naýryzǵa deıin jalǵasady
Bıyl Halyq qatysatyn búdjet baǵdarlamasyn qarjylandyrý ósedi. Bul týraly Almaty qalalyq qarjy basqarmasynyń mamandary málimdedi, dep habarlaıdy Almaty-akshamy.kz Almaty.tv-ge silteme jasap.
Jetisý aýdanyndaǵy bir jyl buryn aram shóp basyp turǵan aýla «Halyq qatysatyn búdjet» baǵdarlamasy aıasynda áldeqaıda túrlengen. Zamanaýı sport jabdyqtary men fýtbol alańy salynǵan. Osylaısha, turǵyndardyń talap-tilegine sáıkes, shaǵyn aýmaq tıimdi qoldanylǵan. Qazir mundaǵy jurt pen balalar qalalyq baǵdarlamanyń ıgiligin kórip otyr.
«Jaı ǵana alań boldy, jańbyr jaýsa, jer balshyq bolatyn. Balalar oınaı almaıtyn edi. Qazir Almatyda mundaı alańdar tek jańa turǵyn úı keshenderinde ǵana salynady ǵoı. Biz turyp jatqan eski úı 1979 jyly salynǵan», – dedi Jetisý aýdanynyń turǵyny Erǵazy Yqylas.
Bıyl da turǵyndar qalalyq baǵdarlamaǵa úmit artyp otyr. Jergilikti jurt búdjetten bólingen qarjyny tıimdi paıdalanýdy kózdeıdi.
«Bıyl da jospar kóp. Turǵyn úıdiń syrtyn syrlasaq. Týzov kóshesi tuıyqta ornalasqan. Onda turǵyndar júretin trotýar joq. Oıymyzdy ákimdikke aıtsaq, qoldaıdy dep senemiz», – dedi Jetisý aýdanynyń turǵyny Dýlat Qylyshbekov.
Baǵdarlama aıasynda jasalatyn árbir joba halyqtyń talap-tilegimen, turǵyndardyń talǵamyna qaraı jasalady. Jetisý aýdany boıynsha ótken jyly 45 ótinim qabyldanǵan. 23 joba kóp daýys jınap, júzege asqan.
«Halyqtan suranys kóp bolǵandyqtan qala ákiminiń tapsyrmasymen qosymsha aqsha bólinip jatyr. Oıyn alańy buzylǵan jaǵdaıda jaýapty merdiger mekeme bir jyldyq kepildik hat boıynsha qaıtadan qalpyna keltirý jumysyn júrgizýge mindetti», – dedi Jetisý aýdany ákimi apparaty komýnaldyq sharýashylyq bóliminiń basshysy Nurdáýlet Qaldarov.
Baǵdarlamaǵa ótinim qabyldaý kezeńi 31 naýryzǵa deıin jalǵasady. Turǵyndar open-almaty.kz saıty arqyly ózine qajetti jobany tańdasa bolady. 2019 jyly pılottyq joba retinde bastalǵan baǵdarlamaǵa bastapqyda 8 mlrd teńge bólingen bolatyn. Bıyldan bastap bul qarjy 15 mlrd teńgege deıin ósken.