Qarýly Kúshterdiń qyzmetkeri Marat Baıqamurov jarystyń jeńimpazy atandy
Áskerı qyzmetshiler arasynda ótken «Ásker barysy» irikteý týrnıri Qorǵanys mınıstrligi Ortalyq sport klýby – Sport komıtetiniń Almatydaǵy bazasynda uıymdastyryldy, dep habarlaıdy Almaty-akshamy.kz.
Saıysta Qarýly Kúshterdiń, Shekara qyzmetiniń, UQK-niń eń myqty degen jıyrma balýany «Ásker barysy» ataǵy úshin kúresti.
– Qazaq kúresi – tól sportymyz. Balýandardyń kúsh synasýy qashannan halyqtyq ónerdiń ajyramas bir bóligi bolyp sanalǵan. Búgin «Ásker barysy» alańynda Qajymuqannyń, Balýan Sholaq pen Imanjúsiptiń dańqty dástúrlerin jalǵastyrýshy myqty balýandar jınaldy. Sportshylar jarqyn, qarqyndy kúres kórsete bildi. Úzdikter respýblıkalyq týrnırde Qarýly Kúshterdiń namysyn qorǵaıtyn bolady, – dedi Qorǵanys mınıstrligi Apparatynyń basshysy, polkovnık Erbol Qumarbekuly
Ortalyq sport klýbynyń sportshysy, Qarýly Kúshterdiń qyzmetkeri Marat Baıqamurov jarystyń jeńimpazy atandy. Ekinshi oryndy Ortalyq sport klýbynyń taǵy bir ókili, Qarýly Kúshterdiń qyzmetkeri Ǵalymjan Qyryqbaev ıelendi. Al «Shyǵys» óńirlik qolbasshylyǵynyń áskerı qyzmetshisi, aǵa serjant Asyljan Qýanyshbekov úshinshi oryn aldy.
Osylaısha, elimizdiń myqty balýandary jınalatyn «Qazaqstan barysy» týrnırinde Qorǵanys mınıstrligi Ortalyq sport klýbynyń sportshylary Marat Baıqamurov pen Ǵalymjan Qyryqbaev óner kórsetetin boldy.