Almatyda epılepsıa dıagnozy qoıylǵan jeti aılyq balaǵa operasıa №2 aýrýhanada nemis hırýrgi Ýlrıh Tomaleniń qatysýymen jasaldy. Bul – otandyq medısınadaǵy joǵary nátıje.
Anasy balasynyń densaýlyǵyndaǵy kinárat týǵannan bar ekenin baıqaǵan. Basynda dárigerler "mundaı jaǵdaı barlyǵynda bolady" dep sabyrǵa shaqyrǵan kórinedi. Anasynyń aıtýynsha, balanyń bir kúnde 50 ret ustamasy ustaǵan kezderi bolypty.
"Bul 7 aıǵa jalǵasty. Sábıdiń mundaı halin kórý aýyr. Sondyqtan ózimdi qolǵa alyp, oǵan ota jasatýǵa bel býdym. Dárigerler alyp ketip bara jatqanda da qorqyp, qasynda otyrýdy suradym. Jansaqtaý bóliminen shyǵarǵanda, kóz ilmeı qarap otyrdym. Qazir densaýlyǵy jaqsy", – dedi balanyń anasy Áıgerim Egeýbaı.
№2 qalalyq klınıkalyq aýrýhananyń neırohırýrg dárigeri Azamat Jaıylǵanov jeti aılyq náreste ota jasaǵan eń jas naýqasy ekenin aıtty.
"Sheteldik bilikti dárigerdiń sheberlik saǵatynan keıin aýrýhanada 4 adamǵa operasıa jasaldy. Barlyǵy sátti aıaqtaldy. Em-domnan keıin olardan epılepsıadan bolatyn ustama anyqtalmady", – deıdi dáriger.