2025 jyldyń 21 qyrkúıeginde, jeksenbi kúni, almatylyqtardyń telefondaryna jer silkinisi týraly jappaı dabyl habarlamalary kelip tústi, dep habarlaıdy aqshamnews.kz
Telefonǵa kelgen habarlamalar turǵyndardy qorqytyp jiberdi. Adamdar úılerin ǵana emes, saýda ortalyqtaryn da tastap shyǵyp, dúrbeleń boldy. Kópshiligi dál sol sátte qala kúnin merekeleý úshin alańda júrgen edi.
Keıin TJM ókilderi Almatydan 9 shaqyrym qashyqtyqta jer asty dúmpýleri tirkelgenin málimdedi. Epısentrdegi magnıtýda 3,8 bolǵan. Al qala aýmaǵynda silkinis múlde sezilmegen.
Sol sebepti eskertý júıesi nege iske qosylǵany týraly suraq týyndady.
22 qyrkúıekte komısıa seısmostansıalarǵa baryp, tekseris bastady. Mamandar tekserý júrgizip jatyr.
Jýrnalıserdiń eske salýynsha, jańa tehnologıa 2024 jyly iske qosylǵan bolatyn. Jobaǵa búdjetten 475 mıllıon teńge jumsalǵan.
Ol kezde turǵyndarǵa tek kúshti jer silkinisi – 4 baldan joǵary bolǵan jaǵdaıda ǵana jedel habarlama jiberiledi dep málimdelgen edi.
"Qazirgi ýaqytta mamandar barlyq mán-jaıdy anyqtaý úshin seısmostansıalar men dachıkterdi zerttep jatyr. Habarlamalardyń ýaqytyly ári naqty jetýin qamtamasyz etý maqsatynda parametrlerdi kalıbrleý men algorıtmderdi naqtylaý jumystary júrgizilýde. Seısmodachıkterdiń deregine sáıkes, 21 qyrkúıekte tirkelgen jer silkinisi halyq pen ınfraqurylym nysandaryna qaýip tóndirmegen", — dedi Almaty qalasy TJD resmı ókili Gúldana Nurymbetova.
21 qyrkúıek kúni saǵat 16:25-te Almaty turǵyndary men qonaqtaryna qala aýmaǵynda sezilmegen, biraq epısentri Almatydan bar bolǵany 9 shaqyrym ońtústik-batysta ornalasqan jer silkinisine baılanysty jedel habarlama keldi. Keıin belgili bolǵandaı, bul habarlamalar seısmologtar dachıkteri tirkegen dúmpýlerden keıin Mass Alert júıesiniń avtomatty túrde qosylýynan jiberilgen.