Almaty qalasynda Uly Otan soǵysyndaǵy Jeńistiń 80 jyldyǵyna arnalǵan «Jeńis joly» atty patrıottyq onlaın-aksıa bastaldy. Igi bastamany qala jastary, blogerler, volonterler men túrli qoǵamdyq uıym ókilderi qoldap, belsendi túrde qatysýda, dep habarlaıdy aqshamnews.kz
Aksıanyń basty maqsaty – áleýmettik jelilerde Almaty qalasyndaǵy tarıhı-eskertkish oryndar týraly aqparat taratý. Qatysýshylar óz paraqshalarynda memorıaldar, eskertkishter, mýzeıler men soǵysqa qatysy bar kóshe ataýlary kórsetilgen fotolar men vıdeolar jarıalap, sol oryndardyń tarıhı mańyzyn aıtyp beredi. Bul arqyly jastar tarıhty jańǵyrtyp, tarıhı oqıǵanyń rýhanı murasyn saqtaýǵa úles qosyp jatyr.
Almatylyq jastar aksıaǵa erekshe belsendilikpen qatysýda. Stýdentter, eriktiler men jastar uıymdarynyń ókilderi tek jazba jarıalap qana qoımaı, shaǵyn ekskýrsıalar ótkizip, beınerolıkter túsirip, óz oqyrmandaryn patrıottyq chellendjge shaqyrýda. Jastardyń bastamasymen bul aksıa shynaıy emosıaǵa, naqty derekterge toly biregeı jobaǵa aınalýda.
Qatysýshylar jarıalanymdaryna arnaıy heshtegterdi belgileýde: #UlyJeńis, #DenPobedy, #DorogaKPobede80, #JeńisJoly80. Bul heshtegter arqyly barlyq jazbalar bir ortaq sıfrlyq estelik keńistigine biriktiriledi. Aksıa jas urpaqtyń tarıhı muramen tanysyp, patrıottyq sana-sezimin oıatýǵa jol ashady.
«Men Panfılovshylar saıabaǵyndaǵy Dańq memorıalyn tańdadym. Bul jer men úshin bala kezden erekshe mańyzǵa ıe. Ár jyly ata-anammen birge osy jerge gúl qoıyp, únsiz taǵzym etetinbiz. Búgin ózim baýyryma sol jerdi kórsetip, panfılovshylar erligi jaıly aıtyp, vıdeo túsirdim. Menińshe, tarıhty este saqtaý jetkiliksiz – ony bólisý mańyzdy», – deıdi aksıaǵa qatysýshy, ál-Farabı atyndaǵy QazUÝ stýdenti Danıar Saparbek.
Qalalyq is-sharalarǵa belsendi qatysyp júrgen bloger Anna Torosán bul aksıany qoldap, óziniń paraqshasynda kelesi jazbany jarıalady:
«Almatynyń qaq ortasynda, 28 gvardıashy-panfılovshylar saıabaǵynda Máńgilik alaý janyp tur — bul Uly Otan soǵysynda qaza tapqan qazaqstandyqtardy máńgi este saqtaýdyń belgisi. Ol 1975 jyly Jeńistiń 30 jyldyǵyna oraı jaǵylyp, sodan beri bul jerge otbasylar, oqýshylar, ardagerler men qala qonaqtary kelip, qurmetpen bas ıedi. Geobelgi: 28 gvardıashy-panfılovshylar saıabaǵy».
Bos ýaqytty tıimdi uıymdastyrý ortalyqtarynyń biri jasóspirimderdiń Dańq mýzeıine ujymdyq sapary týraly bólisti:
«Bul mýzeı — tarıhı jadymyzdy saqtaýshy mańyzdy oryn. Onyń zaldarynda Uly Otan soǵysyna, qazaqstandyq jaýyngerlerdiń maıdan men tyldaǵy erligine arnalǵan baı ekspozısıa qoıylǵan. Munda sarbazdardyń jeke zattary, maıdannan kelgen hattar, qarý-jaraqtar, fotosýretter men qujattar bar. Olar Jeńis jolyndaǵy erlik pen janqıarlyqty baıandaıdy. Osyndaı oryndarǵa barý arqyly biz tek tarıhty bilip qana qoımaı, ony júregimizde saqtaımyz».
Áleýmettik jeli qoldanýshylary da estelik oryndary týraly aqparatpen bólisip, olardyń ornalasqan jerin jáne kimge arnalǵanyn kórsetti:
«Keńes Odaǵynyń Batyry Álıa Moldaǵulovaǵa arnalǵan eskertkish – 1944 jyly shaıqasta erlikpen qaza tapqan aty ańyzǵa aınalǵan mergen qyzdyń qurmetine ornatylǵan. Álıa beınesi tek maıdandaǵy batyr retinde ǵana emes, sonymen qatar áıelderge tán qaısarlyq pen erliktiń sımvoly retinde el jadynda saqtalǵan. Ornalysqan jeri: Tóle bı kóshesi men Nazarbaev dańǵylynyń qıylysy, QazUPÝ janynda.».
Uıymdastyrýshylardyń aıtýynsha, aksıa mamyr aıynyń sońyna deıin jalǵasady. Oǵan kez kelgen qala turǵyny qatysa alady. Ol úshin qaladaǵy bir eskertkish nemese tarıhı oryndy tańdap, onyń tarıhyn baıandap, arnaıy heshtegtermen birge jarıalaý jetkilikti.