27-29 shilde aralyǵynda Almatyda «Túngi qaladaǵy balalar» respýblıkalyq jedel-aldyn alý is-sharasy ótip jatyr. Almaty qalalyq Polısıa departamentiniń Jergilikti polısıa qyzmeti basqarmasy bastyǵynyń orynbasary Aıtan Eleýsizov Óńirlik komýnıkasıalar qyzmetinde osy týraly baıandady.
Spıkerdiń aıtýynsha, is-sharanyń basty maqsaty kámeletke tolmaǵandar arasyndaǵy quqyqbuzýshylyqtyń aldyn alyp, túngi ýaqytta baqylaýsyz júrgen balalardy anyqtaý, sondaı-aq Qazaqstan Respýblıkasynyń «Bala quqyqtary týraly» zańyn buzǵandardy jaýapqa tartý eken.
Almatyda ıývenaldy polısıa ınspektorlary men ýchaskelik polıseılerden turatyn arnaýly toptar qurylyp, alǵashqy kúnniń ózinde edáýir zańbuzýshylyq anyqtaǵan:
• Kámeletke tolmaǵan 137 balanyń saǵat 23:00-den keıin kóshede ata-anasyz júrgeni anyqtaldy. Ata-analary Qazaqstan Respýblıkasy ÁQBtK-niń 442-babynyń 2-bóligi boıynsha ákimshilik jaýapkershilikke tartyldy;
• 163 jasóspirim mán-jaıdy anyqtaý úshin polısıa basqarmasyna jetkizildi;
• 10 jasóspirim profılaktıkalyq esepke qoıyldy;
• Kámeletke tolmaǵandar ishimdik ishken 9 fakt tirkeldi;
• 6 oıyn-saýyq mekemesiniń túnde balalardy kirgizip, zań buzǵany anyqtaldy
«Ata-analary ákimshilik jaýapkershilikke tartylyp, jasóspirimdermen áńgimelestik. Biz zań buzǵan oıyn-saýyq oryndaryn da tirkeýge alyp, ár isti qarap, qolǵa alyp jatyrmyz», - dedi Aıtan Eleýsizov.
Túngi reıdpen qatar, oqý oryndarynda, jastar ortalyqtary men áleýmettik jelilerde túsindirý jumystary júrgizile bastapty. Onda balalar men ata-analarǵa is-sharanyń maqsatyn aıtyp, zań buzǵan jaǵdaıda jaýapqa tartylatyny týraly aqparat beriledi.
«Túngi qaladaǵy balalar» - bul bir rettik aksıa emes, balalardyń quqyǵyn qorǵap, qaraýsyz qalýdyń aldyn alyp, úı-ishindegi qolaısyzdyqtyń, jasóspirimder arasyndaǵy qylmystyń aldyn alý boıynsha jasalyp jatqan júıeli jumystyń bir bóligi. Ásirese jazǵy demalys kezinde mundaı reıdti úzbeı ótkizgeli otyrmyz», - dep tolyqtyrdy óz sózin Aıtan Eleýsizov.
Polıseılerdiń aıtýynsha, osy is-shara alǵashqy kúnnen-aq aıtarlyqtaı nátıje bergen. Qaladaǵy jaǵdaıdy baqylaý kúsheıip, áleýmettik turǵydan qaýipti jaǵdaıda turǵan otbasylarmen jumys jandandy.