Almaty qalasynyń ákímí Darhan Satybaldynyń tóraǵalyǵymen Medeu audanynyń ákímdígímen kezdesu óttí. Jıynda audannyń áleumettík-ekonomıkalyq damuy qorytyndylandy.
Audanda ınjenerlík ınfraqūrylymdy damytu baǵytyndaǵy bírqatar joba qolǵa alynǵan. Atap aıtqanda, «Atyrau», «Tauly Qyrat», «Alatau», «Kamensk ústírtí» jáne ózge de shaǵynaudandarda su qūbyry men káríz júıelerí salynyp jatyr. Jylu taratu jelílerín jańǵyrtu, kóshe jaryǵy júıesín jańalau jáne elektrmen qamtu kabel jelílerí auystyryluda.
Almaty ákímí barlyq ınjenerlík jobany jobalau men júzege asyru jūmystaryn jedeldetu qajettígín atap óttí. Shahar basshysy ınjenerlík jelílerdíń tozu deńgeıíne erekshe nazar audaryp, jūmystardyń sapasy men oryndalu merzímín qatań baqylauda ūstaudy tapsyrdy. Aulalardyń íshkí ınjenerlík jelílerí de keshendí túrde jańartyluǵa tıís. AlJJ mekemesíne barlyq qazu jūmysyn kúzge deıín ayaqtau míndetteldí.
«Erteń tūrǵyndar eshqandaı qolaısyzdyq kórmeuí kerek», – dedí Darhan Satybaldy.
Kezdesu barysynda audannyń sanıtarlyq jaǵdaıy da qalys qalmady. Tūrmystyq qaldyqty uaqytyly shyǵarmau, rūqsatsyz sauda oryndarynyń paıda boluy, shaǵyn sáulet píshínderíníń búlínuí men jol jabynynyń zaqymdanuy sekíldí máseleler anyqtalǵan. Qala ákímí tazalyq pen tártíptí baqylaudy kúsheıtíp, mehanıkalandyrylǵan tazalau jūmystaryn jandandyrudy, quraǵan aǵashtardy kesíp-tazalaudy ayaqtaudy, synǵan kespe tas pen jaryqtandyrudy qalpyna keltírudí tapsyrdy.
«Būǵan deıín de aıtqanmyn, ár audanda tańnan keshke deıín aumaqtyń jaı-kúıín baqylap otyratyn mobıldí top qūru kerek. Máselen, ál-Farabı dańǵylynyń keı jerínde avtomatty suaru júıesí kógaldy emes, joldy suaryp jatyr. Eń bastysy, bíz qarjy bóldík, merdíger bar. Alaıda keıbír audanda álí kúnge deıín merdíger ūıymdardy anyqtauǵa baıqau ótkízílmegení anyqtaldy», – dedí Darhan Satybaldy.
Almaty ákímíne berílgen esep boıynsha jyl sońyna deıín ondaǵan aula men qoǵamdyq keńístík abattandyrylmaq. «Halyq qatysatyn byudjet» baǵdarlamasy ayasynda tūrǵyndardyń bastamalary qolǵa alynǵan. «Terrenkur» demalys aımaǵyn abattandyru men jasyl jelektí qalpyna keltíru jūmystary da ayaqtaluǵa jaqyn.
Kezdesu barysynda audannyń jer bederíníń erekshelígí jáne soǵan baılanysty tuyndaıtyn qauíp-qaterler máselesí de kóteríldí.
«Medeu – geografıyalyq tūrǵydan eń kúrdelí audandardyń bírí. Mūndaǵy shaǵynaudandar tau bókterínde ornalasqan, aumaq sel júru jáne órt shyǵu qaupí joǵary aımaqqa jatady. Būl sízderdíń jūmystaryńyzdyń ózíndík erekshelígín aıqyndaıdy. Mūnda óndírístík nysandar ashudy talap etpeımíz. Basty míndet – tūrǵyndarǵa jaıly jaǵdaı jasau: kógaldandyrudy kúsheıtu, tazalyq pen qauípsízdíktí qamtamasyz etu», – dedí Darhan Satybaldy.
Kezdesu qorytyndysy boıynsha qala ákímí jylytu mausymyna uaqytyly daıyndyqty qamtamasyz etudí, sel júru qaupí bar tau bókterleríndegí órttíń aldyn alu sharalaryn tolyq ayaqtaudy, zańsyz salynǵan nysandardy būzu jūmystaryn kúsheıtudí jáne tūrǵyndardyń ótíníshín tsıfrlyq platforma arqyly jedel qaraudy tapsyrdy.
Sol kúní Darhan Satybaldy Medeu audanynyń tūrǵyndardy qabyldap, olardy tolǵandyrǵan máselelerdí tyńdady. Tūrǵyndar su júıesí, jeke sektordy jaryqtandyru, aulalardyń sanıtarlyq jaı-kúıí, mektep qasbetín jóndeu jáne aulalardy kóríktendíru jaıyn qozǵady. Sonymen qatar jańbyr suyn aǵyzatyn káríz júıesín ornatu, trotuarlardy qalpyna keltíru, áleumettík qoldau kórsetu turaly ūsynystar da aıtyldy. Árbír ótíníshke qatysty jauapty qyzmetterge naqty tapsyrma beríldí. Barlyq másele jítí baqylauǵa alynyp, aldaǵy jūmys josparyna engízíldí.