Almatyda turǵyndar men qala qonaqtarynyń qatynaý múmkindigin arttyrý maqsatynda bıyl 27 qarashadan bastap «Sport saraıy – Medeý sport kesheni» baǵyty boıynsha jańa, turaqty №21 avtobýs marshrýty iske qosylady, - dep habarlaıdy Aqshamnews.kz.
Baǵyttyń jalpy uzyndyǵy 33,6 km. Bul týraly Jol qozǵalysy jáne jolaýshylar kóligin uıymdastyrý basqarmasynyń ókilderi habarlady.
Baǵytqa «Almatyelektrotrans» JSHS qyzmet kórsetedi. Kún saıyn 15 avtobýs jolaýshylar tasymaldaýǵa shyǵady, qozǵalys aralyǵy - 8 mınýt. Paıdalanylatyn kólik quramy – úlken syıymdylyqtaǵy avtobýstar: 28 otyratyn jáne 85 túregep turatyn oryn, bul tanymal týrısik ári sporttyq baǵytta jolaýshylar tasymaldaýǵa múmkindik beredi.
Avtobýstar beınebaqylaý júıesimen, salqyndatqyshpen jáne mobıldi qurylǵylardy qýattaýǵa arnalǵan USB-uıashyqtarmen jabdyqtalǵan. Júrgizýshi kabınasyna zamanaýı elektrondy júıe ornatylǵan, onyń ishinde júrgizýshiniń sharshaýyn jáne áreketterin baqylaıtyn DMS júıesi bar.
Salonda aıaldamalardy avtomatty túrde jarıalaý júıesi jumys isteıdi. Avtomattandyrylǵan habarlaý júıesin qoldaný jolaýshylardyń jaılylyǵyn arttyryp, erekshe qajettiligi bar adamdar úshin qoljetimdilikti jaqsartady jáne qajetti aıaldamadan ótip ketý jaǵdaıyn azaıtý arqyly qaýipsizdikti kúsheıtedi.
