Almatyda QR UǴA akademıgi, Qazaqstannyń eńbek sińirgen ǵylym qaıratkeri, Memlekettik syılyqtyń laýreaty Ábdimálik Nysanbaevtyń, sondaı-aq Qazaqstan Respýblıkasynyń Halyq sýretshisi, memleket jáne qoǵam qaıratkeri Sabyr Mámbeevtiń qurmetine memorıaldyq taqtalar ashyldy. Eskertkish taqtaıshalar olar turǵan úıde ornatyldy.
Ábdimálik Nysanbaevtyń ómiriniń kóp bóligi Fılosofıa jáne quqyq ınstıtýtymen tyǵyz baılanysty. Munda ol aǵa zerthanashydan dırektorǵa deıin kóterildi. Ábdimálik Nysanbaev 570-ten astam ǵylymı, ǵylymı-saraptamalyq, ǵylymı-ádistemelik jumystyń, sonyń ishinde 30 monografıa, jeke kitaptar men oqý quraldaryn jazdy. Birqatar eńbekter 25 shet tilinde jaryq kórdi.
Akademıktiń negizgi zertteý jumysy dıalektıka men tanym teorıasy, ǵylym fılosofıasy men ádisnamasy, qazaq jáne túrki fılosofıasy, áleýmettik jáne saıası fılosofıa, saıasattaný men mádenıettaný máselelerine arnaldy. Ol ǵylym mektebin quryp, kóptegen PhD doktorlary men kandıdattaryn daıyndady.
«Ábdimálik Nysanbaıuly óziniń búkil sanaly ómirin ǵylymǵa arnady. Ol Qazaqstan Respýblıkasy men shet elderdiń bedeldi nagradalarymen marapattaldy. Ol ult rýhanıatynyń damýy men órkendeýine eleýli úles qosqan kórnekti ǵalym retinde halqymyzdyń júreginde máńgi qalady», - dedi Almaty qalasy ákiminiń orynbasary Beıbit Shahanov.
Aıta keteıik, Sabyr Mámbeev 1946 jyly Almaty kórkemsýret ýchılıshesin, sodan keıin I.E. Repın atyndaǵy Lenıngrad keskindeme, músin jáne sáýlet ınstıtýtyn támamdady. Qazaqstan Sýretshiler odaǵyn basqaryp, oqytýshylyq qyzmetti qatar alyp júrdi. Onyń kóptegen jumysy Á.Qasteev atyndaǵy memlekettik óner murajaıynda saqtalǵan. Eń úzdik kartınalary «Taýda» (1957), «Kıiz úıde» (1958). Eskertkish taqta Eńbek sińirgen óner qaıratkeri turǵan Nazarbaev dańǵylyndaǵy №128 úıde ornatyldy.