Búgin QR Mádenıet jáne aqparat mınıstrliginiń qoldaýymen Jambyl atyndaǵy Qazaq memlekettik akademıalyq fılarmonıasy men B.Baıqadamov atyndaǵy Memlekettik hor kapelasynyń 90 jyldyǵy jáne N.Tilendıevtiń 100 jyldyq mereıtoılaryna oraı sýretshi stýdent jastardyń ónerin nasıhattaý maqsatynda T. Júrgenov atyndaǵy Qazaq ulttyq óner akademıasy mektep-ınternat, koleji jáne O. Tańsyqbaev atyndaǵy Almaty sándik - qoldanbaly óner kolejderiniń birlesken «Fılarmonıa jas sýretshiler kózimen» atty plenerlik jumystardyń kórmesi qoıyldy.
26-30 mamyr aralyǵynda uıymdastyrylǵan plenerde eki óner kolejinen iriktelip alynǵan 10 stýdent ǵasyrǵa jýyq tarıhy bar fılarmonıa ǵımaratynyń ishi men syrtqy kórinisin ózindik kózqarastarymen kompozısıalaryna usyndy. Jas sýretshilerdiń salǵan shyǵarmashylyq týyndylary fılarmonıa foıesine qoıylyp, ataýly mereıtoılar taqyrybynda kórme jasaldy. Sharada QR eńbek sińirgen qaıratkeri Bolat Syrlashuly, Qazaqstan Sýretshiler odaǵynyń múshesi Serikbaı Áljanov, Mádenıet salasynyń úzdigi Málik Áýezhanuly, T.Júrgenov atyndaǵy Qazaq Ulttyq óner akademıasynyń profesory Jumaqyn Qaırambaev, keskindeme óneriniń qaıratkerleri jas sýretshilerdiń týyndylaryn baǵalap, shyǵarmashylyq shabyt syılady.
«Fılarmonıa jas sýretshiler kózimen» jobasy – mádenıet pen óner salasyndaǵy urpaqtar sabaqtastyǵyn nyǵaıtýdyń jáne jas daryndardy qoldaý isiniń bir baǵytynyń aıqyn kórinisi. Ulttyq mádenıetimizdi ulyqtap, urpaqqa ulttyq qundylyqtardy nasıhattaý jolynda qara shańyraqta áli de ıgi bastamalar jalǵasyn tabady.