Serbıanyń Birinshi hanymy Tamara Výchıch Almatyda «Serb áıeli: ǵasyrlar toǵysynda» atty kórmenin saltanatty ashylýyna qatysty. Belgrad qalasy mýzeıiniń qorynan alynǵan 100-den astam jádigerden turatyn ekspozısıa Qazaqstanda alǵash ret usynylyp otyr. Qoǵamdaǵy áıel mártebesin dáripteıtin bul kórme Serbıa tarıhy men mádenıetiniń biregeı murasymen tanystyrady.
Ashylý saltanatyna Qazaqstan Respýblıkasynyń Mádenıet jáne aqparat mınıstri Aıda Balaeva, dıplomatıalyq korpýs, Elshilik ókilderi jáne mádenıet qaıratkerleri qatysty.
«Tarıh bizge áıel – ómirdiń bastaýy ekenin úıretedi. Serb áıelderi bılik júrgizip, dıplomatıalyq qarym-qatynas ornatyp, jaýynger retinde el ıgiligine qyzmette de aldyńǵy qatarda boldy. Osy kórmeniń ótýine úles qosqan barshańyzǵa sheksiz alǵys bildiremin», – dedi Tamara Výchıch.
Ekspozısıa 7,5 myń jylǵa jýyq tarıhı kezeńdi qamtıdy. Kórmede arheologıalyq artefaktiler, etnografıalyq jádigerler, sándik-qoldanbaly óner týyndylary jáne XIX ǵasyrdaǵy kórnekti serb áıelderiniń portretteri usynylǵan.
Mınıstr Aıda Balaeva qazaq qoǵamynda áıel – otbasy qundylyqtarynyń saqtaýshysy, danalyq pen rýhanı kúshtiń sımvoly ekenin atap ótti. Túrli tarıhı kezeńderde otbasyn, elin qorǵaýǵa bel býǵan batyr analar men qyzdar jaıly taǵzymmen eske alatynymyzdy aıtty. Bul túsinik serb mádenıetine de jaqyn ekenin, kórmeden aıqyn ańǵarylatynyn jetkizdi.
«Búginde Serbıa men Qazaqstan arasyndaǵy baılanys resmı kelisimdermen ǵana shektelmeıdi. Olar mádenıet, bilim jáne óner salalaryndaǵy birlesken jobalar arqyly jalǵasýda. Sońǵy jyldary mádenı-gýmanıtarlyq saladaǵy yntymaqtastyq aıryqsha belsendi bola tústi. Bul eki el arasyndaǵy ózara qurmet pen dostyqtyń aıqyn belgisi», – dedi mınıstr.
Bul halyqaralyq joba Almaty men Belgrad arasyndaǵy mýzeıaralyq yntymaqtastyqtyń jalǵasy retinde uıymdastyrylyp otyr. 2024 jyly jeltoqsan aıynda Belgrad qalasynda Hanshaıym Lúbısa saraıynda Almaty mýzeıiniń «Uly Dalanyń mádenı murasy» halyqaralyq kórmesi joǵary deńgeıde ótkizildi.
«Serb áıeli: ǵasyrlar toǵysynda» kórmesin 2025 jyly 15 qarashaǵa deıin Almaty mýzeıinde tamashalaýǵa bolady. Mekenjaıy: Almaty qalasy, Qabanbaı batyr kóshesi, 132.