Almaty qalasynyń ákimi Darhan Satybaldy megapolıstegi birqatar áleýmettik jáne ınfraqurylymdyq nysandv aralap, turǵyndardyń ótinishterimen, abattandyrý jumystarynyń nátıjelerimen jáne áleýmettik mekemelerdegi jaǵdaımen tanysty.
Jumys sapary Bostandyq aýdanyndaǵy Rams City turǵyn úı kesheninen bastaldy. Munda ákim turǵyndardyń ótinishin tyńdady. Ásirese, eski úılerde turatyn azamattar kóshý máselesin kóterdi. Darhan Satybaldy bul máseleni jeke baqylaýyna alatynyn jáne jaýapty organdarmen birlesip qarastyrylatynyn atap ótti.
Rams City turǵyn úı kesheniniń turǵyndary da birqatar máseleni aıtty. Olar gıdrooqshaýlaý, jol qozǵalysyn uıymdastyrý jáne polısıa pýnktin ornatý. Ákim osy baǵyttar boıynsha tıisti qyzmetterge naqty sharalar qabyldaýdy jáne jaǵdaıdy turaqty baqylaýda ustaýdy tapsyrdy.
Keıin Darhan Satybaldy Bostandyq aýdanyndaǵy Toraıǵyrov kóshesiniń boıyndaǵy abattandyrylǵan júrginshiler aımaǵymen tanysty. Bul joba «Halyq qatysatyn búdjet» baǵdarlamasy aıasynda júzege asyrylǵan. Abattandyrylǵan aýmaqtyń jalpy kólemi – 2,5 gektar.
Qaıta jóndeý barysynda trotýarlar tolyq jańartylyp, jıektastar ornatyldy, múmkindigi shekteýli azamattar úshin qoljetimdi orta qamtamasyz etildi. Velojoly qalpyna keltirilip, jaryqtandyrý júıesi jańǵyrtyldy. Energıa únemdeıtin shamdarmen jabdyqtalǵan jańa sham tirekteri ornatylyp, bul túngi ýaqytta qaýipsizdik deńgeıin arttyrdy. Sondaı-aq zamanaýı balalar jáne sport alańdary salyndy, qaýipsiz jabyn tóseldi, 200-den astam aǵash pen 1 500 buta egildi, avtomatty sýarý júıesi ornatyldy.
Jumys saparynyń sońynda Darhan Satybaldy Áýezov aýdanyndaǵy «Parasat» jáne «Shańyraq» áleýmettik qyzmet kórsetý ortalyqtaryna bardy.
«Parasat» ortalyǵy 2005 jyly qurylǵan jáne psıhonevrologıalyq aýrýlary bar balalar men eresekterge arnaýly áleýmettik qyzmet kórsetedi. 2025 jyly júrgizilgen kúrdeli jóndeýden keıin munda ońaltý, delfınoterapıa, ıppoterapıa, shyǵarmashylyq sheberlik jáne VR-terapıa kabınetteri ashyldy. Ortalyq 360 adamǵa qyzmet kórsetýge arnalǵan, munda 132 qyzmetker eńbek etedi.
– Biz erekshe qajettiligi bar ár azamat ózine qamqorlyq pen qoldaýdy sezinetin jaǵdaı jasaýymyz kerek. Mundaı ortalyqtar adamdarǵa beıimdelýge, kásibı kómek alýǵa jáne tolyqqandy ómir súrýge múmkindik beredi, – dedi Darhan Satybaldy.
«Shańyraq» ortalyǵy 2001 jyldan beri jumys isteıdi jáne egde jastaǵy azamattar men I-II toptaǵy múgedektigi bar adamdarǵa arnalǵan stasıonarlyq mekeme bolyp tabylady. Qazirgi ýaqytta munda 292 adam turady, olardyń 108-i – múgedektigi bar azamattar. Ortalyqta medısınalyq, psıhologıalyq jáne mádenı qyzmetter kórsetiledi. Kúrdeli jóndeý júrgizilip, aýmaq abattandyryldy, beınebaqylaý ornatyldy jáne tuzdy bólme ashyldy.
Sapar qorytyndysynda qala ákimi Almatynyń qalalyq ınfraqurylymyn damytý, aýdandardy abattandyrý jáne turǵyndarǵa kórsetiletin áleýmettik qyzmetterdiń sapasyn arttyrý baǵytyndaǵy júıeli jumysty jalǵastyrýdy tapsyrdy.