Almatyda búgin naǵyz fýtbol merekesi! Qazaqstan Premer-lıgasynyń basty qarsylastary «Qaırat» pen «Astana» arasyndaǵy sheshýshi machqa myńdaǵan jankúıer jınaldy. Oıyn aldyndaǵy atmosferany kórgende, bul kúndi almatylyqtar úshin tek fýtbol keshi emes, naǵyz otbasylyq meıram deýge bolady. Erekshe atmosfera jaıly Aqshamnews.kz tilshisi tolyqtyrady.
Búgingi «Qaırat» pen «Astana» arasyndaǵy kezdesý Qazaqstan fýtbolynyń naǵyz el-klassıkosy. Oıynnyń taǵdyry chempıondyqqa tikeleı áser etetindikten, jankúıerlerdiń qoldaýy erekshe. Stadıon mańynda kóterińki kóńil kúı, mýzyka men urandar, balalardyń kúlkisi men qolyndaǵy komandalyq jalaýshalar bári de bul keshtiń erekshe ekenin ańǵartady.
Machty tamashalaýǵa kelgenderdiń arasynda almatylyq Ramazan Ermekov te bar. Ol ulyn ertip, súıikti komandasyna jankúıer bolýǵa kelgen.
«Búgingi oıyn chempıondyqtyń taǵdyryn sheshedi. Qaıratty qoldaımyz, jeńiske jetedi dep senemin. Aýa raıy da tamasha, barlyǵy da tartysty oıynnyń bolaryna ıshara», - deıdi ol.
Al Qaskeleńnen kelgen jankúıer Alıar óz qoldaýyn erekshe bildiripti. Onyń jeıdesiniń aldyna «Almaty álem astanasy», al artyna «Qyzym, sen meniń súıiktimsiń» dep jazylǵan.
«Búgin eki el-klassıko bar: biri Ispanıada, biri Almatyda. Óz Qaıratymnyń jeńisine senemin. Esep 3:1, árıne Qaırattyń paıdasyna!» - deıdi ol.
Oıynǵa otbasymen kelgenderdiń biri almatylyq Mıras. Ol jary men balasymen birge stadıonǵa erte kelgen.
«Biz úshin mundaı machtarǵa barý dástúr. Bul tek fýtbol emes, otbasylyq demalys, jaqsy kóńil kúı. Qaırat jeńse, búgingi kún eki ese qýanyshqa aınalady», - deıdi ol.
Stadıon aınalasyndaǵy shat-shadyman kóńil kúı men halyqtyń yqylasyn kórgende, fýtboldyń eldi biriktiretin qýatty kúsh ekenin sezesiń. Almaty búgin tek fýtboldy ǵana emes, birlikti, otbasylyq jylylyqty jáne sport rýhyn toılap jatyr.