Almaty qalasynda azamattardy merzimdi áskerı qyzmetke shaqyrý júıesin jetildirý boıynsha júıeli jumys júrgizilýde.
Qala ákimdigi áskerge shaqyrý naýqanynyń tıimdiligin arttyrýǵa baǵyttalǵan keshendi sharalardy júzege asyryp keledi, - dep habarlaıdy Aqshamnews.kz.
Negizgi baǵyttardyń biri – qalalyq jınaq pýnktin (QJP) ornalastyrý máselesiniń sheshilýi boldy. Qala ákimi tapsyrmasy boıynsha QJP Túrksib aýdanynda, V. Berınga kóshesi, 31 mekenjaıyndaǵy buryn Almaty qalasynyń İİM akademıasy ornalasqan ǵımaratqa aýysty.
Jalpy aýdany 2800 sharshy metr, irgeles aýmaǵy 0,63 gektar nysan tolyq paıdalanýǵa daıyn jáne qazirgi zamanǵy qaýipsizdik pen ınfraqurylym talaptaryna tolyq sáıkes keledi. Ǵımaratta akt zaly, sport zaly jáne asqana bar, bul áskerge shaqyrylýshylar men qyzmetkerler úshin barynsha qolaıly jaǵdaı jasaýǵa múmkindik beredi.
Ǵımarat qalanyń komýnaldyq menshigine berilip, Almaty qalasynyń mobılızasıalyq daıyndyq jáne aýmaqtyq qorǵanys qyzmetiniń balansyna bekitildi.
Bıyl Almaty qalasy Jumyldyrý daıyndyǵy, aýmaqtyq jáne azamattyq qorǵanys basqarmasy ǵımaratta aǵymdaǵy jóndeý jumystaryn júrgizdi. Jóndeý barysynda ınjenerlik jeliler jańartylyp, ishki árleý jáne aýmaqty abattandyrý jumystary atqaryldy. Bul qyzmetkerler men áskerge shaqyrylýshylar úshin jaıly jaǵdaı jasaýǵa múmkindik berdi.
Buǵan deıin, 2019 jyldan bastap, qalalyq jınaq pýnkti ýaqytsha Qorǵanys mınıstrliginiń «Áskerı-tehnıkalyq mektebi» RMK bazasynda (Bostandyq aýdany) ornalasqan bolatyn. 2025 jyldyń kókteminde 1 686 adam, al kúzgi áskerge shaqyrý kezinde 1 930 adam shaqyrylǵanyn eskere otyryp, pýnktti jańa, arnaıy beıimdelgen ǵımaratqa kóshirý týraly sheshim qabyldandy.
Áskerge shaqyrýǵa daıyndyq jáne ony ótkizý jumystary qalanyń barlyq aýdanynda belsendi túrde jalǵasyp jatyr.