Qazaqstan Premer-lıgasynyń basty oıyny — «Qaırat» pen «Astana» arasyndaǵy kezdesý tek elimizdiń emes, sheteldik jankúıerlerdiń de nazaryn ózine aýdarǵan aıtýly oqıǵaǵa aınaldy.
26 qazan kúni Almatynyń Ortalyq stadıonynda myńdaǵan kórermen chempıondyq altyn taǵdyryn sheshetin tartysty machty tamashalaý úshin bas qosty, - dep habarlaıdy Aqshamnews.kz.
Ortalyq stadıon qaqpasyna alǵashqylardyń biri bolyp Óskemennen kelgen 16 jastaǵy Tımýr Meıramǵalıev jetti. Ol ata-anasy jáne inilerimen birge arnaıy osy machqa at basyn burǵan.
— Búgingi oıyndy ótkizip alý múmkin emes. Eldiń eń myqty eki klýby kezdesedi, bul bizdiń maqtanyshymyz. Ásirese, ózim qatarly Sátbaevtyń oıynyn asyǵa kútip júrmin. Búkil otbasymyzben «Qaıratty» qoldaımyz. Men segiz jasymnan fýtbol oınaımyn, endi inilerim de aınalysa bastady. Ákem de buryn oınaǵan, fýtbol bizdiń otbasylyq dástúrimiz. Fýtbolǵa bir ret ǵashyq bolsań, ol ómir boıy jalǵasady, — deıdi Tımýr kúlimsirep.
Jankúıerler arasynda «Qaıratty» jaı ǵana komanda emes, ómiriniń bir bólshegine aınaldyrǵandar da bar. Almatylyq Danıl Korkeshko óz estelik bólisti:
— «Qaırat» meniń týǵan komandam. Buryn ózim de osy klýbtyń sapynda oınaǵanmyn. Bul joly jeńis kútemin, eń azy 3:0 esebimen aıaqtalsye. Bıyl «Qaırat» tipti «Realmen» kezdesken edi, endi basty maqsat — chempıon bolý. Sonda bálkim, kelesi joly «Barselona» sıaqty álemdik klýbtar da keler. Ókinishke qaraı, jaraqat saldarynan oınamaımyn, biraq júregim árdaıym komandammen birge, — deıdi ol.
Kórermender arasynda aǵylshyn jankúıerleri de bar. Solardyń biri Manchester qalasynan kelgen tanymal bloger jáne StuntPegg atty YouTube-arnasynyń avtory Nıv Petrýssıello.
— Qazaqstan týraly jaqynda ǵana estidim, biraq bárin óz kózimmen kórý qyzyq boldy. «Qaırat» jaıly kóp oqydym. Ózim fýtbolmen tynystaıtyn qala — Manchesterdenmin. Bilemin, birneshe jyl buryn «Manchester Iýnaıted» «Astanamen» oınaǵan. Endi «Qaırat» pen «Astananyń» oıynyn kórýge keldim, ekeýi de óte myqty komandalar, sondyqtan oıyn áserli bolatyny anyq, — dedi Nıv.
Qazaqstan men shetelden kelgen jankúıerlerdi biriktirgen bul mach eldegi sport ınfraqurylymynyń damýyn jáne Almatynyń iri sporttyq ortalyq retindegi mártebesin aıqyn kórsetti. Kórermenderdiń qoldaýy oıynǵa erekshe rýh pen atmosfera syılady. Osylaısha, Almaty taǵy da óz mártebesin — Qazaqstannyń sport astanasy ekenin dáleldedi.