Túrksib aýdanynyń «Jas Qanat» shaǵyn aýdanynda qaraýsyz qalǵan aýmaq jaıly qoǵamdyq keńistikke aınaldy. Joba «Halyq qatysatyn búdjet» baǵdarlamasy aıasynda júzege asyryldy, dep habarlaıdy aqshamnews.kz
Skver aýmaǵynda keshendi jumystar júrgizildi: asfált pen kespe tas tóseldi, kóshege jaryqtandyrý elementteri, avtomatty sýarý júıeleri, oryndyqtar men qoqys jáshikteri ornatyldy. Sonymen qatar, avtoturaq oryndary jabdyqtalyp, aryq júıesi júrgizildi. Aldaǵy maýsymda jas kóshetter otyrǵyzý josparlanyp otyr, bul skverdi odan ári jasyl jelekke aınaldyryp, jaıly ete túsedi.
Jańa keńistiktiń basty ereksheligi – aýdany 450 m² bolatyn muz aıdyny. Jaz mezgilinde ol rolık tebýge arnalǵan alańǵa aınalmaq. Muz aıdyny jergilikti turǵyndardyń, ásirese balalardyń kóńilinen shyqty. Olar bul jerde ýaqytyn qyzyqty ótkizýde.
«Maǵan sabaqtan keıin osynda kelip, syrǵanaý qatty unaıdy. Úıime jaqyn jerde muz aıdyny bolsa eken dep kópten armandaǵan edim. Qazir men mánerlep syrǵanaýdyń keıbir elementin úırenip aldym, tipti artqa syrǵanaı alamyn. Qazir dostarymmen birge jańa elementterdi: aınalý men spıráldy úırenip júrmiz. Keshke kelseńiz keremet, gırlándalar janyp turady, bári óte ádemi ári erekshe atmosfera beredi», – dedi «Jas Qanat» shaǵyn aýdanynyń turǵyny Arman Batyrov.
Túrksib aýdanynda «Halyq qatysatyn búdjet» baǵdarlamasy aıasynda jalpy 40 kórkeıtý jobasy josparlanǵan. Baǵdarlamanyń tıimdiligin jáne turǵyndardyń belsendiligin eskere otyryp, 2024 jyly Almaty ákimi Erbolat Dosaev qarjylandyrýdy 18,8 mlrd teńgege deıin arttyrdy, bul 2023 jylmen salystyrǵanda 5,8 mlrd teńgege kóp. Osylaısha, almatylyqtarǵa aýlalardy, qoǵamdyq keńistikterdi, sport jáne balalar alańdaryn qurýǵa arnalǵan 364 jobany usyný men júzege asyrý múmkindigi berildi.