Almatyda bıyl toǵyz aıda 9 myńnan astam adam ataýly áleýmettik kómek aldy

Almatyda az qamtylǵan jáne áleýmettik osal sanattaǵy azamattarǵa ataýly áleýmettik kómek kórsetý jáne arnaıy áleýmettik qyzmetter usyný jumysy jalǵasyp keledi. 2025 jyldyń basynan beri áleýmettik qorǵaý salasynda qala turǵyndaryna 21 myńnan astam memlekettik qyzmet kórsetilgen. Onyń ishinde járdemaqy rásimdeý, az qamtylǵan otbasylarǵa kómek kórsetý jáne áleýmettik qyzmet kórsetý bar. Bul týraly qalalyq Jumyspen qamtý jáne áleýmettik baǵdarlamalar basqarmasynyń ókilderi habarlady. Egde jastaǵy azamattarǵa, erekshe qajettiligi bar adamdarǵa (onyń ishinde balalarǵa) jáne qıyn ómirlik jaǵdaıda qalǵan tulǵalarǵa arnaıy áleýmettik qyzmetter kórsetýge erekshe kóńil bólinip otyr. Jyl basynan beri shamamen 9 myń almatylyq osyndaı arnaıy áleýmettik qyzmetterdi paıdalandy. Kómek túrleri stasıonarlyq, jartylaı stasıonarlyq jaǵdaıda jáne úıde kórsetiledi. Bıyl ataýly áleýmettik kómek tóleýge 1,8 mıllıard teńgeden astam qarajat bólingen. Qazirgi tańda 1 819 otbasy, ıaǵnı 9 063 adam osy kómekti alyp otyr. Buǵan qosa, 1 jastan 6 jasqa deıingi balalary bar az qamtylǵan otbasylarǵa balalar taǵamy men turmystyq hımıa taýarlaryn satyp alýǵa arnalǵan aı saıynǵy tólem beriledi. Turǵyn úı-kommýnaldyq qyzmetterge jumsalatyn shyǵyndary belgilengen shekten asyp ketken azamattarǵa turǵyn úı kómegi kórsetilip jatyr. Bul maqsatqa 2025 jyly shamamen 30 mıllıon teńge qarastyrylǵan, júzdegen otbasy osy kómekti aldy. Sondaı-aq, komýnaldyq qyzmet tarıfteriniń ósýine baılanysty áleýmettik jaǵynan muqtaj jekelegen sanattaǵy azamattarǵa ótemaqy tólemderi berilip jatyr. Jumyspen qamtý jáne áleýmettik baǵdarlamalar basqarmasynyń habarlaýynsha, ataýly áleýmettik kómektiń (AÁK) basty maqsaty – tek materıaldyq járdem berý emes, sonymen qatar azamattardyń eńbek belsendiligin arttyrýǵa jáne otbasylardy ómirdiń qıyn jaǵdaıynan shyǵýǵa yntalandyrý. AÁK jan basyna shaqqandaǵy tabysy kedeılik sheginen tómen otbasylarǵa beriledi. Ol eki túrge bólinedi: densaýlyǵyna baılanysty eńbekke qabiletsiz azamattarǵa kórsetiletin shartsyz kómek jáne otbasynyń eńbekke qabiletti músheleri jumyspen qamtý baǵdarlamalaryna qatysqan jaǵdaıda shartty kómek beriledi.