Áleumettík mańyzy bar azyq-túlík tauarlarynyń baǵasyn tūraqtandyru jáne otandyq óndírushílerdí qoldau máselelerí boıynsha Almaty ákímí Darhan Satybaldy «Qazaqfılm» shaǵynaudanynda ótetín demalys kúngí jármeńkege, sondaı-aq «Magnum Cash & Carry» sauda jelísíníń supermarketíne bardy.
Demalys kúngí jármeńke ár senbí jáne jeksenbí kúnderí saǵat 08:00-den 18:00-ge deıín tūraqty túrde ótkízíledí. Jármeńke aumaǵynda 96 sauda orny jūmys ísteıdí. Saudaǵa Eńbekshíqazaq, Qarasaı jáne Íle audandarynan kelgen sharua jáne fermerlík qojalyqtar qatysady. Sapar barysynda qala ákímí otandyq auyl sharuashylyǵy óndírushílerín júıelí qoldaudyń jalǵasatynyn atap óttí.
«Bízdíń míndet — tūrǵyndardy qoljetímdí árí sapaly azyq-túlíkpen qamtamasyz etu, sondaı-aq fermerler úshín qolaıly jaǵdaı jasau», — dedí Darhan Satybaldy jármeńke qatysushylarymen kezdesu kezínde.
Kásípkerler jármeńkeníń jūmysy toqtap qaluy múmkín degen alańdaushylyq bíldírdí. Osyǵan oraı ákím qazírgí uaqytta jármeńke formatyn odan árí jańǵyrtu sharalary pysyqtalyp jatqanyn jetkízdí. Būl jobaǵa zamanauı tásílder engízuge, qyzmet kórsetu sapasyn arttyruǵa jáne deldaldardy boldyrmaı, tek fermerlerdíń tíkeleı qatysuyn qamtamasyz etuge múmkíndík beredí.
Odan keıín Darhan Satybaldy «Magnum Cash & Carry» jauapkershílígí shekteulí seríktestígíníń sauda jelísíne bardy. «Magnum» — Almatydaǵy eń írí bólshek sauda jelísí. Qalada 80 dúken jūmys ísteıdí, olardyń jalpy aumaǵy 180 myń sharshy metrden asady. «Magnum» jelísínde Almaty boıynsha 5,2 myńnan astam adam jūmyspen qamtylǵan. Sauda jelísíníń qyzmetín 1,5 mıllıon almatylyq paıdalanady. 2019 jyldan bastap «Magnum Cash & Carry» áleumettík mańyzy bar azyq-túlík tauarlarynyń baǵasyn tūraqtandyru baǵdarlamasyna belsendí qatysyp keledí. Osy kezeńde jelí tómendetílgen baǵamen 100 myń tonnadan astam óním ótkízdí.
Qazírgí uaqytta 10,4 myń tonna kókónís satyp alu jáne ótkízu boıynsha forvardtyq kelísím, sondaı-aq 11 túrlí tauardyń baǵasyn bekítu úshín aınalym qaryzy turaly kelísím qoldanysta. 2025 jyldyń basynan berí baǵdarlamanyń arqasynda qazaqstandyqtar azyq-túlík satyp alu kezínde 1,5 mlrd teńge únemdedí.