Almatyda agroónerkásiptik keshendi (AÓK) damytýǵa arnalǵan búdjet qarajatyn jymqyrǵan memlekettik qyzmetkerler sottaldy.
QR Sybaılas jemqorlyqqa qarsy is-qımyl agenttiginiń Almaty qalasy boıynsha departamentiniń málimetinshe, Almaty qalasy Medeý aýdandyq №2 sotynyń úkimimen Almaty qalasy Aýyl sharýashylyǵy jáne veterınarıa basqarmasynyń burynǵy basshysy A.Kerimbek, onyń qaramaǵyndaǵylar K. Ábdijabbarova, D. Tazabek jáne «Molprodýkt» JSHS dırektory R. Súleımenova búdjet qarajatyn jymqyrǵany úshin kináli dep tanyldy, dep habarlaıdy Almaty-akshamy.kz QazAqparatqa silteme jasap.
Memlekettik qyzmetkerler aýyl sharýashylyǵy salasyndaǵy agroónerkásiptik keshen sýbektilerin sýbsıdıalaýǵa bólingen 423 mln teńgeni jymqyrǵan «A.Kerimbek, K. Ábdijabbarova men D.Tazabekke memlekettik qyzmet atqarý quqyǵynan ómir boıyna aıyra otyryp, 7 jyl bas bostandyǵynan aıyrý jazasy taǵaıyndaldy. Al, R. Súleımenovaǵa komersıalyq uıymdarda 5 jyl merzimge basshylyq laýazymdardy atqarý quqyǵynan aıyra otyryp, 7 jyl bas bostandyǵynan aıyrý jazasy taǵaıyndaldy». – delingen agenttik taratqan aqparatta.