2 mamyr kúni QR Saýda jáne ıntegrasıa mınıstri Arman Shaqqalıev jumys saparymen Almaty qalasyna baryp, bazarlardy jańǵyrtý máseleleri boıynsha bıznes ókilderimen kezdesý ótkizdi, dep habarlaıdy aqshamnews.kz
Kezdesý barysynda bazarlardy jańǵyrtý kezinde týyndaıtyn máseleler talqylandy. Taraptar bazarlardy jańǵyrtý barysynda týyndaıtyn kedelgiler men olardy júıeli sheshý joldaryna basa nazar aýdardy.
Mınıstr Almaty qalasy ishki saýdadaǵy negizgi ortalyq ekenin erekshe atap ótti. 2025 jyldyń qańtar-naýryz aılarynyń qorytyndysy boıynsha Almatydaǵy ishki saýda aınalymynyń kólemi 5 149,4 mlrd teńgeni qurady. Naqty kólem ındeksi josparly kórsetkishten (102,9%) asyp, 103,1 paıyzǵa jetti. Almatydaǵy saýda aınalymy respýblıkalyq saýdanyń 36,2 paıyzyn alyp otyr. Bul óńirler arasyndaǵy eń joǵary kórsetkish. Atalǵan kezeńde bólshek saýda kólemi 1 447,7 mlrd teńgeni (NKI — 106,8%), kóterme saýda — 3 678 mlrd teńgeni (NKI — 101,7%) qurady.
Bul kórsetkishter turaqty, zamanaýı saýda ınfraqurylymyn odan ári jetildirý qajettiligin rastaıdy. Sıfrlyq sheshimder men saýdanyń zamanaýı formattaryn belsendi engizý – keltirilgen statısıkany odan ári damytýǵa múmkindik beredi. Al bazarlardy jańǵyrtý – osy saladaǵy basym baǵyttardyń biri bolyp qala beredi.
Sońǵy 10 jylda elde bazarlardy jańǵyrtý boıynsha aýqymdy jumys júrdi. Qazir Almaty qalasynda 59 bazar jumys istep tur. Onyń 70% - y jańǵyrtylǵan. Ótken jyly Almatyda alty bazarda modernızasıa jumystary aıaqtaldy. Bekitilgen kestege sáıkes, bıylǵy jyldyń sońyna deıin taǵy on nysanda jańǵyrtý jumystaryn aıaqtaý josparlanǵan. Qazirgi ýaqytta olardyń tórteýinde belsendi qurylys júrip jatyr.
Sonymen birge, alty naryq boıynsha bekitilgen merzimdi saqtamaý qaýpi bar. Oǵan jer ýchaskelerin paıdalanýǵa shekteýler, tehnıkalyq sharttar, ákimshilik kedergiler jáne qarjy resýrstarynyń tapshylyǵy sebep bolyp otyr. Osyǵan baılanysty mınıstr jaýapty memlekettik organdar men bıznes sýbektileri arasyndaǵy úılestirýdi kúsheıtýdi, sondaı-aq jobalardyń iske asyrylý barysyna júıeli monıtorıń júrgizýdi tapsyrdy.
"Bazarlardy Táýelsizdik alǵan sátten bastap elimizde qoldanylatyn normatıvtik tehnıkalyq aktilerdiń — qurylys, órtke qarsy, sanıtarlyq-epıdemıologıalyq talaptaryna sáıkestendirýimiz kerek", - dedi QR Saýda jáne ıntegrasıa mınıstri.
Arman Shaqqalıev Almaty qalasy elimizdiń eń iri qarjy jáne saýda ortalyǵy ǵana emes, sonymen qatar ozyq sheshimderdi engizý alańy ekenin atap ótti. 2024 jyldyń 1 qarashasynan bastap Halyq Bankimen birlesip "Digital Bazar" pılottyq jobasy iske asyrylýda. Qazirgi ýaqytta jobaǵa Almaty qalasy men Almaty oblysynyń 7 bazary tartylǵan, servıske 4 276 klıent qosylǵan. Jobany iske asyrý, elektrondyq saýda platformalaryn damytý, qolma-qol aqshasyz esep aıyrysýlardy engizý jáne qarjy-tehnologıalyq sheshimdermen ıntegrasıalaý megapolıstiń saýda salasyn sıfrlandyrýdyń joǵary deńgeıin kórsetedi.
"2026 jyldan bastap jańǵyrtýdan ótpegen bazarlar jumysyn jalǵastyra almaıdy. Bul qazirgi ýaqyt talaby. Qaýipsizdik, ashyqtyq jáne yńǵaılylyq saýda standartyna aınalýy tıis", - dep tolyqtyrdy mınıstr