Balalardy ońaltýdyń damýy jańa serpin aldy
Almatyda Densaýlyq saqtaý mınıstrliginiń balalarǵa medısınalyq kómek kórsetýdi jetildirý jónindegi kóshpeli otyrysy ótti, dep habarlaıdy Almaty-akshamy.kz.
Jıynǵa S. J. Asfendıarov atyndaǵy Qazaq ulttyq medısına ýnıversıteti» KeAQ bazasynda QR DSM, Ana men bala densaýlyǵyn saqtaý departamentiniń ókilderi, QR-daǵy DDU jáne IýNISEF halyqaralyq uıymdarynyń ókilderi, barlyq 20 óńirdiń densaýlyq saqtaý basqarmalarynyń mamandary, balalyq shaq boıynsha bas shtattan tys balalar mamandary, «Pedıatrıa jáne balalar hırýrgıasy ǵylymı ortalyǵy» AQ jáne «University Medical Center» KQ jetekshi mamandary, medısınalyq joǵary oqý oryndarynyń balalar kafedralarynyń oqytýshylary qatysty.
Keńeske qatysýshylardyń nazarynda balalardyń densaýlyǵyn saqtaý jáne nyǵaıtý, QR-da balalarǵa medısınalyq kómek kórsetýdi uıymdastyrýdy jetildirý máseleleri boldy.
Densaýlyq saqtaý vıse-mınıstri Vácheslav Dýdnık óz baıandamasynda atap ótkendeı, balalardyń densaýlyǵyn saqtaý densaýlyq saqtaýdyń, memleket pen qoǵamnyń ózekti jáne mańyzdy máseleleriniń biri bolyp qala beredi. Balalardyń densaýlyǵy eldiń eresek turǵyndaryn qalyptastyrýdyń irgeli negizin quraıdy.
Densaýlyq saqtaýdy damytýdyń memlekettik baǵdarlamalarynyń strategıalyq is-sharalaryn iske asyrý balalardyń ómiri men densaýlyǵyn saqtaýda eleýli nátıjelerge qol jetkizýge ákeldi. Qazaqstanda uryqtyń jatyrishilik damý kezeńinen bastap balanyń densaýlyǵyn saqtaý boıynsha biryńǵaı strategıa engizildi.
Onyń aıtýynsha, Qazaqstanda medısınalyq-sanıtarıalyq alǵashqy kómektiń áleýmettik baǵdarlanǵan modeli iske asyryldy, profılaktıkalyq medısına belsendi damýda, mamandandyrylǵan jáne joǵary mamandandyrylǵan medısınalyq kómektiń jańa tehnologıalary engizildi. Balalardy ońaltýdyń damýy jańa serpin aldy.
«Búgin bizde dıalog formatynda balalarǵa medısınalyq kómekti uıymdastyrý boıynsha problemalyq máselelerdi talqylaýǵa jáne kezdesýge múmkindik týdy. Biz sizdiń suraqtaryńyzdy tyńdap, qyzmetti damytý perspektıvalaryn aıtqymyz keledi, jańa buıryqtarmen tanystyrǵymyz keledi. Sondaı - aq, búgin elimizde alǵash ret ázirlengen neonataldyq kómek kórsetýdi uıymdastyrý standarty usynylatynyn atap ótkim keledi», - dedi vıse-mınıstr keńeske qatysýshylarǵa arnaǵan sózinde.
Sodan keıin ol Qazaqstan Respýblıkasy Densaýlyq saqtaý mınıstriniń atynan standarttyń negizgi ázirleýshisi profesor Tamara Qurmanǵalıqyzy Chývakovaǵa alǵysyn bildirdi
Óz kezeginde DDU eldik Densaýlyq saqtaý baǵdarlamalarynyń ulttyq úılestirýshisi L.Ótemisova balalarǵa medısınalyq kómek kórsetýdi uıymdastyrý jónindegi keńestiń mańyzdylyǵyn atap ótti.
«QR DSM elimizdegi balalardyń densaýlyq jaǵdaıyn jaqsartý úshin kóp jumys atqarýda, alaıda aýrýdyń damý qaýpiniń faktorlaryna nazar aýdarmaı, balalardyń, onyń ishinde mektep oqýshylarynyń densaýlyǵyn jaqsartý máselelerinde tabysqa jetý múmkin emes. Sońǵy zertteýler kórsetkendeı, oqýshylardyń densaýlyǵynyń nasharlaý úrdisi jaqsarmaıdy, óıtkeni dene belsendiliginiń tómendeýi, gadjetterde kóp ýaqyt ótkizý, sozylmaly aýrýlardyń ósýi jáne t.b. Ákimdikter, densaýlyq saqtaý júıesi deńgeıinde osy máselege nazar aýdarý qajet», - dedi DDU ókili.
IýNISEF-tiń QR-daǵy ókiliniń orynbasary Letısıa Bazzı-Veıl QR-da balalar densaýlyǵyn damytýda aıtarlyqtaı jetistikterge qol jetkizildi dep esepteıdi. Ol sońǵy esepterde ana men bala óliminiń tómendeý úrdisi baıqalǵanyn jáne Qazaqstan osy kórsetkishti tómendetý boıynsha 10 eldiń qatarynda ekenin atap ótti. Bul rette IýNISEF ókili osal jerlerde, shalǵaı aýdandarda, tótenshe jaǵdaılarda balanyń damýyna nazar aýdarýǵa shaqyrdy.