Almatyda jyl basynan beri avtobýstarda bıletsiz júrgen 270 jolaýshy anyqtalǵan. Olarǵa qandaı shara qoldanylady? Qoǵamdyq kóliktegi qaýipsizdik qandaı? Metroǵa qansha adam minedi? Bul suraqtardyń jaýabyn bilý úshin Aqshamnews.kz Almaty qalalyq mobıldilik basqarmasyna arnaıy saýal joldady.
Vedomstvo málimetinshe, 2025 jyldyń basynan beri "Almatyelektrkólik" JSHS baqylaý-tekserý qyzmeti qoǵamdyq kólikte 270 bıletsiz jolaýshyny anyqtady.
Olarǵa qandaı jaza qoldanyldy?
- 200 adamǵa Qazaqstan Respýblıkasynyń Ákimshilik quqyqbuzýshylyq týraly kodeksiniń 622-baby (qoǵamdyq kólikte bıletsiz jol júrý) boıynsha ákimshilik hattama toltyrylyp,
- 70 jolaýshyǵa profılaktıkalyq nusqaýlyq júrgizildi.
"Baqylaý is-sharalary qoǵamdyq kólikte jolaqysyn tóleý mádenıetin qalyptastyrýǵa jáne zańbuzýshylyqtardy azaıtýǵa baǵyttalǵan. Mundaı tekserýler turaqty túrde jalǵasady", - delingen jaýapta.
Alaıda vedomstvo ókilderi qandaı jaǵdaıda hattama toltyrylyp, qandaı jaǵdaıda nusqaýlyq júrgiziletinin túsindirmedi.
Jańa ortalyq kólik sapasyn qalaı baqylaıdy?
2025 jyly Almaty ákimdiginiń bastamasymen "Almaty qalasynyń jol qozǵalysyn uıymdastyrý ortalyǵy" JSHS qurylǵan. Qazir bul ortalyq qoǵamdyq kólikte bıletsiz jolaýshylardy anyqtaý isin júıeli uıymdastyrý máselesin qarastyryp otyr. Sonymen qatar, ortalyq avtobýs parkteriniń sapa krıterıılerin qadaǵalaıdy. Atap aıtqanda:
-
avtobýstardyń tehnıkalyq jaǵdaıy;
-
júrgizýshilerdiń biliktiligi;
-
jol qozǵalysy erejelerin saqtaý deńgeıi;
-
qaýipsizdik quraldarynyń bolýy men jaramdylyǵy (qaýipsizdik beldikteri, órtsóndirgish, avarıalyq shyǵýlar);
-
navıgasıalyq jabdyqtardyń jumys isteýi.
Qoǵamdyq kólikterde ne bolýǵa tıis?
Búginde Almatyda 2500-ge jýyq kondısıonermen jabdyqtalǵan avtobýs qatynaıdy.
"Árbir avtobýsta alǵashqy medısınalyq kómek qobdıshasy bolýy mindetti. Onyń bar-joǵy men jaramdylyǵyn kóliktik baqylaý ınspeksıasy men polısıa departamenti birlesip tekserip otyrady", - dep jaýap berdi vedomstvo ókilderi.
Sonymen qatar, avtobýs júrgizýshileri úshin jol qozǵalysy qaýipsizdigi jáne alǵashqy medısınalyq kómek kórsetý boıynsha júıeli túrde nusqaýlyqtar ótkiziledi.
Jańa kólik jobalary
Qalada kólik ınfraqurylymyn damytý maqsatynda jańa metro stansıalary men BRT (júrdek avtobýs kóligi) jelisi salynyp jatyr. Raıymbek dańǵylynda BRT qurylysy belsendi júrgiziledi.
Sondaı-aq, ekologıalyq kólikti damytý maqsatynda dızel avtobýstardy gaz jáne elektr energıasymen júretin avtobýstarǵa aýystyrý jumystary jalǵasyp jatyr.
2024 jyly "Almatyelektrkólik" 600 gaz jáne 100 elektravtobýstardy satyp aldy. Jekemenshik parkter de jyl aıaǵyna deıin ekologıalyq avtobýstardy alýdy josparlap otyr.
Almatyda qansha marshrýt sýbsıdıalanady?
Qazir Almatyda 206 áleýmettik mańyzy bar marshrýt memleket tarapynan sýbsıdıalanady. Bıylǵa arnalǵan sýbsıdıa kólemi shamamen 140 mıllıard teńge boldy.
Avtobýs parkteriniń jaǵdaıy
Komýnaldyq avtobýs parkterinde júrgizýshiler men qyzmetkerlerge arnalǵan jataqhana men demalys oryndary qarastyrylǵan. Bul ǵımarattar zaman talaptaryna saı jabdyqtalǵan.