Almaty qalasynyń Óńirlik komýnıkasıalar qyzmetiniń alańynda QR joǵary áskerı oqý oryndaryna túsý kezeńderi týraly Radıoelektronıka jáne baılanys Áskerı-ınjenerlik ınstıtýtynyń bastyǵy, polkovnık Qaırat Daýtov aıtyp berdi, dep habarlaıdy almaty-akshamy.kz
Instıtýt 6 mamandyq boıynsha daıarlaýdy júzege asyrady. Qazirgi ýaqytta 600-den astam kýrsant oqıdy. Oqý ornynda 17 kafedra bar, onyń ishinde 170 oqytýshy jumys isteıdi.
"Oqýǵa túsýdiń barlyq sharttary Qorǵanys mınıstriniń 2016 jylǵy 22 qańtardaǵy № 35 buıryǵynda egjeı-tegjeıli baıandalǵan. Barlyq talapkerler tegin negizde oqýǵa qabyldanady. UBT nátıjesi boıynsha ótý baly keminde 50 baldy quraıdy. Instıtýtqa túsý úshin beıindik pánder fızıka jáne matematıka bolyp tabylady jáne osy pánder boıynsha UBT-da eń tómengi bal 7 baldy quraıdy. Jergilikti áskerı basqarý organdaryna ótinish berý merzimi oqýǵa túsý jylynyń sáýir aıyna deıin. Bıylǵy jyly kóptegen talapkerdiń ótinishin eskere otyryp, Qorǵanys mınıstri bul merzimdi 15 maýsymǵa deıin uzartty", - dedi Qaırat Daýtov.
Onyń aıtýynsha, suranysqa ıe mamandyqtar - zenıttik zymyrandyq, radıotehnıkalyq áskerler, baılanys jáne aqparatty qorǵaý. Qazirgi ýaqytta radıoelektrondyq barlaý jáne jaýyngerlik mamandyǵy tanymal bolyp keledi. Sonymen qatar, baılanys mamandaryn daıarlaý barysynda kýrsanttar 50-den astam beıindik pánderdi oqıdy, olardyń ishinde elektrodınamıka, antena jáne qabyldaý-taratý qurylǵylary, komýtasıa quraldary jáne ártúrli maqsattaǵy radıostansıalar.
"Bolashaq ofıserlerdi daıarlaýdaǵy basty baǵyttardyń biri – olarda dene tárbıesi jáne salaýatty ómir saltyn qalyptastyrý. Qazirgi ýaqytta bizdiń ınstıtýt kýrsanttary Qazaqstan Respýblıkasynyń atynan TMD-ǵa qatysýshy memleketterdiń áskerı qyzmetshileri arasyndaǵy Halyqaralyq sporttyq saıysqa qatysady", - dep bólisti Q.Daýtov.
Bolashaq ofıserlerdiń dene shynyqtyrý daıyndyǵy úshin ınstıtýtta sporttyq jattyǵý zaldary, stadıon jáne áskerı-qoldanbaly sport túrlerine arnalǵan trenajerler bar.
"Áskerı-oqý oryndarynyń, atap aıtqanda bizdiń ınstıtýttyń erekshelikteriniń biri – oqýdy aıaqtaǵan barlyq kýrsanttyń 100% jumysqa ornalasýynda. Bizdiń túlekter Qarýly Kúshterdiń barlyq túrlerine, áskerı bólimderge, sondaı-aq basqa da kúsh qurylymdaryna jiberiledi. Áskerı mamandyq bedeldi ári tanymal bolyp tabylady", - dep atap ótti ol.
20 jyldyq tarıhy bar ınstıtýttyń óz dástúrleri de qalyptasqan. Onyń ishinde 5-kýrs kýrsanttarynyń qoshtasý konsertin uıymdastyrý, túlekterdiń "leıtenant aleıasyna" bolashaq talapkerlerge arnap tilek kapsýlasyn salýy, aǵash otyrǵyzý jáne t.b..
Sonymen qatar, ınstıtýt kýrsanttary jyl saıyn túrli olımpıadalarǵa, zıatkerlik konkýrstarǵa, sonyń ishinde halyqaralyq deńgeıdegi jarystarǵa qatysady. Bıyl kýrsanttar Sankt-Peterbýrg qalasynda ótken ınformatıka páninen Halyqaralyq olımpıadaǵa jáne ınstıtýt bazasynda ótken matematıka páninen Halyqaralyq olımpıadaǵa qatysty.