QR Qorǵanys mınıstrliginiń málimetinshe, Keńes Odaǵynyń Batyry general-maıor Ivan Panfılovtyń nemeresi Alýa Baıqadamova basqaratyn Ulttyq áskerı-patrıottyq ortalyq pen Jaýyngerlik dańq murajaıynyń fılıaly ornalasqan Armıa úıinde de qaıta qalpyna keltirý jumystary júrgizilip jatyr. Ǵımarattyń konserttik jáne mármár zaldary, sondaı-aq Jaýyngerlik dańq murajaıy kúrdeli jóndeýden ótýde. Onda ofıserler klýby men balalarǵa arnalǵan áskerı-patrıottyq fılmder túsiretin kınopavılon ashylady.
«Almaty úshin Armıa úıiniń mádenı mańyzy zor. Bul – tarıhı sáýlet eskertkishi. Sondyqtan biz onyń bastapqy kelbetin qalamyz ben elimizdiń eń kórikti jerleriniń biri retinde saqtaýǵa mindettimiz», - dep atap ótti Rýslan Jaqsylyqov garnızonǵa sapary barysynda.
Ǵımaratty qaıta qalpyna keltirýdegi basty erekshelikterdiń biri ashyq aspan astyndaǵy jaýyngerlik tehnıka murajaıyn ashý bolmaq. Murajaı ekspozısıasyn Uly Otan soǵysy jyldaryndaǵy qarý-jaraqtyń 30-ǵa jýyq úlgisi quraıdy. Eń qundy eksponattardyń qatarynda 1931 jylǵy 152 mm gaýbısa bar.
«Jaýyngerlik tehnıka murajaıynyń Armıa úıi úshin mańyzy zor bolmaq. Ol Qaldaıaqov kóshesiniń oń jaǵynda ornalasady. Al sol jaǵynda ákimdik kúshimen almatylyqtar men qala qonaqtarynyń demalýyna arnalǵan gúlzar salynatyn bolady. Biz bul nysandardyń barlyǵy Jeńistiń 80 jyldyǵyna oraı ashylatynyn maqtan tutamyz», - dedi Alýa Baıqadamova.
Sonymen qatar Qaldaıaqov kóshesinde jastardyń patrıottyq tárbıesindegi zamanaýı tásilderdi beıneleıtin jańa barelef ornatyldy.