AQSH, EO, Azıa jáne TMD-nyń 15-ke jýyq elderinen jetekshi ǵalymdar men arhıv isiniń sarapshy mamandary qatysady
Qazaqstan Respýblıkasy Prezıdentiniń Arhıvi Halyqaralyq arhıvter keńesiniń demeýimen 2022 jylǵy 19-21 qazanda Almaty qalasynda «Ashyq qoǵamǵa – ashyq Arhıv» I Halyqaralyq arhıvıster Kongresin ótkizedi, dep habarlaıdy Almaty-akshamy.kz.
Qazaqstan álemniń 200 eliniń arhıvshilerin biriktiretin IýNESKO uıymynyń qurylymy – Halyqaralyq arhıvter keńesi basshylyǵynyń qoldaýymen jáne qatysýymen kásibı arhıv qoǵamdastyǵy is-sharasyn ótkizetin TMD elderindegi alǵashqy memleket boldy.
İs-sharanyń maqsaty – tarıhty saqtaýshylardyń kásibı qoǵamdastyǵynyń ózara is-qımyly men syndarly dıalogy úshin turaqty jumys isteıtin halyqaralyq kelissóz alańyn qurý, tarıhı-mádenı jáne derekti murany saqtaýdyń ózekti máseleleri boıynsha usynystardy, sheshimderdi talqylaý jáne qabyldaý, arhıvti damytýdyń ınovasıalyq ıdeıalaryn qalyptastyrý, jobalardy iske asyrý jáne úzdik arhıvtik tájirıbelerdi tırajdaý.
Kongres aıasynda mádenıet, óner, ádebıet, ǵylym jáne bilim arqyly qoǵam úshin arhıvtik qujattardyń róli men mańyzyn ashatyn taqyryptyq alańdar (arhıvtik pikirtalas kýrstar) uıymdastyrylatyn bolady. Arhıvtik lektorııler formatynda shaqyrylǵan negizgi spıkerlerdiń sóz sóıleýimen kásibı sesıalar josparlanǵan jáne olardyń qorytyndysy boıynsha ashyq talqylaýlar ótedi.
Kongreske spıkerler retinde otandyq arhıvshiler men zıaly qaýym ókilderimen qatar AQSH, EO, Azıa jáne TMD-nyń 15-ke jýyq elderinen jetekshi ǵalymdar men arhıv isiniń sarapshy mamandary qatysady.
Jumys tilderi: qazaq, orys, aǵylshyn, túrik, qytaı.
2022 jyldyń 19 qazany saǵat 10.00-de (Astana q. ýaqytymen, GMT +6) Halyqaralyq arhıvshilerdiń Kongresiniń resmı ashylý rásimi ótedi. Ashylý saltanatyna QR Prezıdenti Ákimshiligi men QR Mádenıet jáne sport mınıstrliginiń ókilderi, Almaty qalasynyń ákimdigi, sheteldik jáne otandyq arhıv mekemeleriniń basshylary, dıplomatıalyq korpýs ókilderi, memleket jáne qoǵam qaıratkerleri qatysady dep kútilýde.